Ortalyq Azııa elderi tabıǵı apattar qaýpin seıiltý júıesin nyǵaıtýǵa ýaǵdalasty
TAShKENT. KAZINFORM — Aımaq elderi «Ortalyq Azııadaǵy apattar qaýpin seıiltý júıesin nyǵaıtý» bastamasyn iske asyrady. Bul týraly Halyqaralyq zilzala qurbandaryn eske alý kúni aıasynda uıymdastyrylǵan jaýapty vedomstvo basshylarynyń kezdesýinde QR Tótenshe jaǵdaılar mınıstri Shyńǵys Árinov aıtty, dep habarlaıdy Kazinform agenttiginiń Tashkenttegi menshikti tilshisi.
— Búgingi kezdesý Halyqaralyq zilzala qurbandaryn eske alý kúni aıasynda uıymdastyrylyp otyr, tıisinshe ol tabıǵı apattardyń aýyr zardabyn álemdik qaýymdastyqtyń esine salady. Bul — memleketterdiń ózara is-qımyldardy biriktirý qajettiligin kórsetedi. Búgin biz «Ortalyq Azııadaǵy apattar qaýpin seıiltý júıesin nyǵaıtý» bastamasyn iske asyrǵaly otyrmyz. Biz ony resmı sıpatqa ıe mehanızm ǵana emes, sondaı-aq qaýipsizdik salasyndaǵy ózara yntymaqtastyqtyń jańa modelin qalyptastyratyn qural retinde qarastyramyz, — dedi mınıstr.
Ol atap ótkendeı, óńirdegi klımattyq ózgeris, jer silkinisi, sý tapshylyǵy jáne tehnogendik apattar tıimdi úılestirilgen is-qımyldardy talap etedi.
— Qazaqstan halyqaralyq yntymaqtastyqty nyǵaıtý, ornyqty damý qaǵıdattaryn ilgeriletý jáne tótenshe jaǵdaılarda ujymdyq kúsh biriktirýge baǵyttalǵan bastamalarǵa qoldaý kórsetedi. Taıaýda Qazaqstan Prezıdenti Qasym-Jomart Toqaevtyń Buharaǵa jasaǵan saparynda Ahýaldyq ortalyqtyń jumysymen tanysty. Onda halyqtyń qaýipsizdigin qamtamasyz etý jáne yqtımal tótenshe jaǵdaılarǵa daıyndyq máselelerine erekshe nazar aýdaryldy. Bul azamattardy qorǵaý máselesi memlekettik saıasattyń ózegi ekenin aıǵaqtaıdy. Osy rette taldaý jáne boljaý ortalyqtaryn birlese damytýǵa, memleketaralyq oqý-jattyǵýlardy turaqty negizde uıymdastyrýǵa erekshe nazar aýdarý qajet dep sanaımyz, — dep málim etti vedomstvo basshysy.
Sonymen qatar Kazinform tilshisine suhbat bergen Ózbekstan Tótenshe jaǵdaılar mınıstrliginiń baspasóz hatshysy Mýrat Sadykov konferentsııanyń mańyzy jaıly baıandady.
— Ózderińiz biletindeı 1966 jyly 26 sáýirde Tashkentte iri jer silkinisi boldy. Osy qaıǵyly zilzala qurbandaryn eske alýǵa jáne tabıǵı apattardyń saldaryn tómendetýge arnalǵan bul is-shara halyqaralyq qaýymdastyq tarapynan qoldaýǵa ıe bolyp otyr. Konferentsııaǵa qatysýshylar ortaq is-qımyl josparyn ázirleý múmkindikterin qarastyryp jatyr. Bul is-shara tek qurbandardy eske alýmen shektelmeıdi, sondaı-aq ol yqtımal apattardy boljaý, tótenshe jaǵdaı kezindegi jumysty úılestirý máselelerin talqylaýǵa arnalǵan, — dedi Mýrat Sadykov Kazinform tilshisiniń saýalyna jaýap bere otyryp.
Іs-shara sońynda mınıstrler birlesken málimdemege qol qoıdy.
Eske salaıyq, buǵan deıin Tashkentte Halyqaralyq zilzala qurbandaryn eske alý kúnine arnalǵan konferentsııa ótip jatqanyn habarlap edik.
