OA elderi Syrdarııa basseıninde sý esebin avtomattandyrý josparynyń jobasyn ázirlemek
ASTANA. KAZINFORM – Túrkistan qalasynda Ortalyq Azııanyń Memleketaralyq sý sharýashylyǵyn úılestirý komıssııasynyń (MSShÚK) 94-otyrysy ótti, dep habarlaıdy QR Sý resýrstary jáne ırrıgatsııa mınıstrliginiń baspasóz qyzmeti.
Іs-sharaǵa QR Sý resýrstary jáne ırrıgatsııa mınıstri Nurjan Nurjigitov, Tájikstan Respýblıkasynyń Energetıka jáne sý resýrstary mınıstri Daler Djýma, Túrikmenstannyń Memlekettik sý sharýashylyǵy komıtetiniń tóraǵasy Dýrdy Gendjıev, Ózbekstan Respýblıkasynyń Sý sharýashylyǵy mınıstri Shavkat Hamraev, sondaı-aq Túrkistan oblysynyń ákimi Nuralhan Kósherov pen Qazaqstannyń Ózbekstandaǵy elshisi Eraly Toǵjanov qatysty.
Taraptar 2026 jylǵy vegetatsııa kezeńine arnalǵan Syrdarııa jáne Ámýdarııa ózenderi basseınderindegi sý qoımalarynyń jumys rejımderi men sý bólý lımıtterin qarady. Sonymen qatar Syrdarııa ózeni basseıninde sý resýrstarynyń esebin júrgizýdiń avtomattandyrylǵan júıesin engizý josparynyń jobasyn ázirleý máselesi talqylandy. Otyrysqa qatysýshylar qujatty ázirleýdi maquldady. Bıylǵy qyrkúıekke deıin osy másele boıynsha arnaıy jumys tobyn qurý josparlanyp otyr.
Sý sharýashylyǵy vedomstvolarynyń basshylary Dúnıejúzilik bankpen birlesip júzege asyrylyp jatqan Ortalyq Azııa elderiniń sý resýrstaryn tıimdi paıdalaný boıynsha óńirlik yntymaqtastyqqa arnalǵan granttyq jobanyń (CAWEC) iske asyrylý barysyn da qarastyrdy. Sondaı-aq kún tártibinde Halyqaralyq Araldy qutqarý qorynyń quryltaıshy memleketteri basshylary keńesteriniń sheshimderinen týyndaıtyn mindetterdiń oryndalýy talqylandy.
-Memleketaralyq sý sharýashylyǵyn úılestirý komıssııasy kóp jyl boıy Ortalyq Azııadaǵy sý sharýashylyǵy salasyndaǵy sheshimderdi kelisýge arnalǵan negizgi kásibı alań bolyp keledi. Dál osy jerde Syrdarııa men Ámýdarııa ózenderi basseınderiniń transshekaralyq sý resýrstaryn birlesip basqarýdyń tıimdi tásilderi ázirlenip, óńir memleketteriniń múddeler teńgerimi men aldaǵy kezeńdegi sý paıdalanýdyń turaqtylyǵy qamtamasyz etiledi, – dedi Sý resýrstary jáne ırrıgatsııa mınıstri Nurjan Nurjigitov.
Aıta keteıik, MSShÚK-nyń úılesimdi jumysynyń arqasynda bıyl Shardara sý qoımasyna turaqty sý kelýi qamtamasyz etildi. 2026 jylǵy 1 sáýirden beri sý qoımasyna shamamen 3 mlrd tekshe metr sý tústi. Bul ótken jyldyń jáne kópjyldyq ortasha kórsetkishterden joǵary. Vegetatsııa kezeńi aıaqtalǵanǵa deıin sýdyń kelýi jalǵasady dep kútilip otyr. Syrdarııa ózeni basseınindegi sý sharýashylyǵy jaǵdaıy turaqty. Aýyl sharýashylyǵy qajettilikteri úshin sý shtattyq rejımde berilip jatyr.
Ortalyq Azııa Memleketaralyq sý sharýashylyǵyn úılestirý komıssııasynyń kelesi, 95-otyrysy Túrikmenstanda ótedi.
Osyǵan deıin elimizde jerasty sýyn keshendi paıdalaný jáne basqarý tujyrymdamasy ázirlenip jatqany týraly jazdyq.
