Ortalyq Azııa elderi men Reseı ónerkásiptik kooperatsııany birlese damytýǵa ýaǵdalasty
TAShKENT. KAZINFORM — Ózbekstan astanasynda Ortalyq Azııa elderi jáne Reseı ónerkásip mınıstrleriniń alǵashqy otyrysy ótti, dep habarlaıdy Kazinform agenttiginiń Tashkenttegi menshikti tilshisi.
Kezdesýge aımaq elderi men Reseıdiń ónerkásip mınıstrleri jáne olardyń orynbasarlary qatysty. Jıynda alǵash bolyp baıandama jasaǵan Ózbekstannyń ınvestıtsııa, ónerkásip jáne saýda mınıstri Lazız Kýdratov memleketter jeke damý ustanymynan ortaq jobalardy ilgeriletý ıdeıasyna oıysýy qajet ekenin atap ótti.
— Biz búginde tek saýdamen shektelmeı, tereń ónerkásiptik kooperatsııaǵa kóshý qajettigin túsinip otyrmyz. Ózbekstanda Reseı men Ortalyq Azııa elderi kapıtalynyń qatysýymen 5500-den astam kásiporyn quryldy. Bul memleketterdiń joǵary iskerlik belsendiliginiń nátıjesi. Reseı, Qazaqstan, Qyrǵyzstan, Tájikstan jáne Túrkimenstanmen birlesken jobalar iske asyp jatyr, — dedi Lazız Kýdratov.
Sonymen qatar ol yntymaqtastyqty nyǵaıtýǵa baǵyttalǵan birneshe usnys aıtty.
— Birinshiden, Reseı men Ortalyq Azııa elderiniń ónerkásiptik kooperatsııasynyń biryńǵaı baǵdarlamasyn ázirleý qajet. Ol áleýetti bastamalardy júıelep, ónerkásiptik ózara is-qımyldarǵa serpin beredi. Ekinshiden, «Jas ónerkásip kóshbasshylary — 2030» óńirlik baǵdarlamasyn iske qosýdy usynamyz. Baǵdarlama aıasynda keminde 10 000 bilikti kadrdy daıarlaýǵa bolady. Úshinshi bastama — «Ortalyq Azııa — Reseı» saraptamalyq tobyn qurý. Onyń quramyna salalyq mınıstrlikter, vedomstvolar, elshilikter men saýda ókildikteriniń sarapshylary enýi tıis, — dep túıindedi L.Kýdratov.
Otyrysqa qazaqstandyq delegatsııany bastap kelgen Ónerkásip jáne qurylys mınıstri Ersaıyn Naǵaspaev óńirdegi ónerkásiptik kooperatsııa men ózara taýar aınalymy kóleminiń artyp kele jatqanyna toqtaldy.
— 2025 jyldyń qorytyndysy boıynsha Qazaqstannyń Ortalyq Azııa elderimen jalpy taýar aınalymy 8,8 mlrd dollarǵa jetip, 2024 jylmen salystyrǵanda 14,5%-ǵa ulǵaıdy. Bul rette ónerkásip ónimderiniń ózara saýdasy 7,2 mlrd dollarǵa teńeldi, al birlesken jobalardyń portfeli qazirdiń ózinde 2,2 mlrd dollarǵa jýyqtady, — dedi vedomstvo basshysy.
Onyń sózinshe, ózbek tarapymen quny 8 mlrd dollar bolatyn birlesken ınvestıtsııalyq jobalardy iske asyrýǵa baǵyttalǵan Jol kartasyna qol qoıýǵa daıyndyq júrip jatyr. Bul bastama Qazaqstan Prezıdenti Qasym-Jomart Toqaevtyń Buharaǵa sapary barysynda jan-jaqty talqylanǵan.
— Óńirdiń basqa memleketterimen osyndaı qujattardy daıyndaý jáne iske asyrý tájirıbesin damytý mańyzdy dep sanaımyn. Bul ózara is-qımylǵa neǵurlym júıeli sıpat berýge jáne ónerkásiptik kooperatsııany nyǵaıtýǵa múmkindik beredi. Sondyqtan «Ortalyq Azııa — Reseı» formatynda tikeleı dıalogty jalǵastyrý ýaqtyly qabyldanǵan sheshim dep esepteımin, — deıdi Ersaıyn Naǵaspaev.
Otyrys aıaqtalǵannan soń mınıstr áriptesterimen birge «INNOPROM. Ortalyq Azııa — 2026» ónerkásiptik kórmesiniń ashylý saltanatyna qatysty. 22 sáýirge deıin jalǵasatyn is-sharaǵa 35-ten astam el qatysyp jatyr.
Eske salaıyq, birneshe kún buryn Tashkentte ornalasqan Ortalyq Azııa halyqaralyq ınstıtýtynda «Qazaq-ózbek odaqtastyq qatynastarynyń jańa kezeńi: Buhara sammıtinen keıingi qadamdar» taqyrybynda dóńgelek ústel ótti. Onda sarapshylar taıaýda Buharada ótken Prezıdent Qasym-Jomart Toqaev pen Ózbekstan basshysy Shavkat Mırzıeev arasyndaǵy beıresmı kezdesýdiń nátıjesine ekpin túsire otyryp, keleshek yntymaqtastyq baǵyttaryn talqylady.
Qosa ketsek, bıyl alǵashqy eki aıda Qazaqstan men Ózbekstan arasyndaǵy taýar aınalymy 830 mln dollardan asty.
Sonymen qatar taıaýda Tashkentte Qazaqstan men Ózbekstan Syrtqy ister mınıstrlikteriniń ózara yntymaqtastyq baǵdarlamasy qabyldandy.
