Ortalyq Azııa elderi men Qytaı 17 mlrd dollardyń kelisimine qol qoıdy
ASTANA. KAZINFORM — Búgin Astanada ótip jatqan «Qytaı — Ortalyq Azııa» iskerlik keńesiniń ekinshi otyrysy aıasynda jalpy quny 17 mıllıard AQSh dollarynan asatyn 35-ten astam memorandýmǵa qol qoıyldy.
Bul týraly «Atameken» UKP basqarma tóraǵasynyń orynbasary, Qazaqstannyń Syrtqy saýda palatasynyń basshysy Murat Qarymsaqov málim etti. Onyń aıtýynsha, kelisimder jasyl energetıka men ınfraqurylymnan bastap logıstıka, saýda jáne jańa hab qurý sııaqty negizgi salalardy qamtıdy.
— Bul format 2023 jyly Sıan qalasynda bastaý aldy jáne ony Ortalyq Azııa elderi men Qytaı Halyq Respýblıkasynyń kóshbasshylary qoldady. Birinshi otyrys Sıanda ótti. Tústen keıin Memleket basshylarynyń qatysýymen sammıt ótedi, biz iskerlik keńestiń ekinshi otyrysyn ótkizip jatyrmyz. Іskerlik keńeske Ortalyq Azııa elderi men Qytaıdan 1000-nan astam qatysýshy, ıaǵnı 6 memlekettiń ókilderi keldi. Otyrystyń baǵdarlamasy óte mazmundy, onyń ishinde plenarlyq otyrys, paneldik sessııalar, iskerlik kezdesýler, keń kólemdegi kórmeler uıymdastyryldy. Atalǵan sharalardyń qorytyndysynda kelisimder men memorandýmdarǵa qol qoıýmen aıaqtaldy, — dedi M. Qarymsaqov elordada ótken «Qytaı — Ortalyq Azııa» iskerlik keńesiniń ekinshi otyrysynda BAQ ókilderiniń saýalyna jaýap bere turyp.
Aıta ketsek, 2024 jyly Ortalyq Azııa óńiri men Qytaı arasyndaǵy saýda qarqyny 95 mlrd AQSh dollaryna jetken jáne onyń jartysyna jýyǵy Qazaqstanǵa tıesili boldy. Osylaısha, ekijaqty saýda aınalymy rekordtyq 44 mlrd dollarǵa jetken.