Ortalyq Azııa elderi men DDU 2026–2030 Jol kartasyn iske asyrý tetikterin qarastyrdy
ASTANA. KAZINFORM - Jeneva qalasynda Dúnıejúzilik densaýlyq saqtaý uıymynyń shtab-páterinde Ortalyq Azııa elderiniń densaýlyq saqtaý mınıstrleriniń DDU-nyń Eýropalyq óńiri boıynsha óńirlik dırektory Hans Klıýgemen 79-shy Dúnıejúzilik densaýlyq saqtaý assambleıasy alańyndaǵy beıresmı kezdesýi ótti.
Talqylaýdyń negizgi taqyryby 2026–2030 jyldarǵa arnalǵan Ortalyq Azııa elderiniń densaýlyǵy men ál-aýqatyn qorǵaý jónindegi Jol kartasyn (OAJK 2.0) odan ári ilgeriletý, sondaı-aq ony saıası turǵyda bekitý jáne praktıkalyq iske asyrý tetikteri boldy. Kezdesý barysynda óńir elderi OAJK 2.0-di iske asyrýdyń kelesi kezeńine ótýge daıyn ekenin rastady.
Onyń ishinde medıtsınalyq-sanıtarııalyq alǵashqy kómekti damytý, densaýlyq saqtaý júıeleriniń ornyqtylyǵyn nyǵaıtý, tótenshe jaǵdaılarǵa daıyndyqty arttyrý, kadrlyq áleýetti damytý, sondaı-aq densaýlyq saqtaý salasyndaǵy birlesken ınvestıtsııalyq bastamalardy ilgeriletý máseleleri qamtyldy.
Kezdesýde sóz sóılegen Qazaqstannyń Densaýlyq saqtaý mınıstri Aqmaral Álnazarova Qazaqstan Jol kartasyn biryńǵaı óńirlik densaýlyq saqtaý arhıtektýrasyn qalyptastyrýdyń jáne Ortalyq Azııa elderi arasyndaǵy yntymaqtastyqty keńeıtýdiń praktıkalyq quraly retinde qarastyratynyn atap ótti.
- Búginde Ortalyq Azııa óńirlik ózara is-qımyldyń joǵary deńgeıin jáne densaýlyq saqtaý men ornyqty damý máselelerin birlesip sheshýge degen umtylysty kórsetip otyr. Bizde alǵa jyljý úshin barlyq qajetti alǵysharttar bar: saıası erik, elder arasyndaǵy senim, halyqaralyq áriptesterdiń qoldaýy jáne densaýlyqqa salynǵan ınvestıtsııa – óńirdiń ornyqty bolashaǵyna salynǵan ınvestıtsııa degen ortaq túsinik, – dep atap ótti vedomstvo basshysy.
Kezdesý barysynda medıtsınalyq-sanıtarııalyq alǵashqy kómekti damytý máselesine erekshe nazar aýdaryldy.
Qazaqstan 1978 jylǵy Almaty-Astana deklaratsııasy men 2018 jylǵy Astana deklaratsııasy murasyna súıene otyryp, halyqaralyq deńgeıde MSAK qaǵıdattaryn ilgeriletýge beıildiligin rastady. Bul qujattar qazirgi zamanǵy medıtsınalyq-sanıtarııalyq alǵashqy kómek júıesiniń jahandyq negizine aınaldy. Sondaı-aq Almaty qalasyndaǵy DDU-nyń Eýropalyq MSAK ortalyǵynyń qyzmeti jeke talqylandy.
Búginde bul ortalyq saraptamalyq qoldaý kórsetý, mamandar daıarlaý jáne alǵashqy medıtsınalyq-sanıtarııalyq kómektiń zamanaýı tásilderin engizý boıynsha negizgi óńirlik platformalardyń biri sanalady.
Kezdesý sheńberinde Qazaqstan MSAK boıynsha elderdiń jahandyq koalıtsııasyn odan ári ilgeriletýge jáne DDU men halyqaralyq áriptestermen praktıkalyq yntymaqtastyqty keńeıtýge múddeli ekenin de rastady.
Talqylaý qorytyndysy boıynsha Ortalyq Azııa elderi men DDU 2026–2030 jyldarǵa arnalǵan OAJK 2.0-di saıası turǵyda rásimdeý jáne tolyqqandy iske qosýdy qamtamasyz etý boıynsha qadamdardy odan ári úılestirýge daıyn ekenin málimdedi.
Aıta keteıik, DDU Ebola vırýsy sırek shtamynyń taralýyna baılanysty dabyl qaqty.
