Ortalyq Azııa elderi men Ázerbaıjannyń saýda mınıstrleri Tashkentte bas qosty

TAShKENT. KAZINFORM – Búgin Tashkentte Ortalyq Azııa elderi men Ázerbaıjannyń saýda jáne ınvestıtsııa mınıstrleri keńesiniń birinshi otyrysy ótti, dep habarlaıdy Kazinform agenttiginiń menshikti tilshisi.

Іs-sharaǵa Qazaqstannyń Saýda jáne ıntegratsııa mınıstri Arman Shaqqalıev qatysty. Vedomstvo basshysy baıandamasynda resmı Astana men Tashkent Ortalyq Azııadaǵy saýdanyń negizgi draıveri sanalatynyn atap ótti. Onyń sózinshe, keleshek ósimdi qamtamasyz etý úshin birlesken óndiris ashý, tsıfrlyq ıntegratsııaǵa den qoıý jáne kólik dálizderin damytý mańyzdy.

Sondaı-aq qatysýshylar otyrys barysynda saýda-ınvestıtsııalyq ózara is-qımyldy tereńdetý, ónerkásiptik kooperatsııany damytý, logıstıkany júıeli jolǵa qoıý múmkindikterin talqylady.

Іs-sharanyń qorytyndysy boıynsha Ortalyq Azııa elderi men Ázerbaıjannyń saýda jáne ınvestıtsııa mınıstrleri birlesken kommıýnıkege qol qoıdy.

Eske salaıyq, bıylǵy 9 aıdyń qorytyndysy boıynsha Qazaqstan Ózbekstannyń negizgi saýda seriktesteriniń úshtiginde qaldy. Qamtylyp otyrǵan kezeńde resmı Tashkent Astanaǵa 1 mlrd dollardyń taýaryn eksporttap, 2,4 mlrd dollardan astam somaǵa ónim ımporttaǵan.

Buǵan deıin habarlaǵanymyzdaı, Ózbekstanda qazaqstandyq kapıtalmen jumys isteıtin kompanııalar qatary kóbeıdi. Atap aıtqanda, jarty jyldyń ishinde bizdiń el Ózbekstanda 116 kásiporyn ashty. Osylaısha, qazir resmı Tashkentte qazaqstandyq kapıtalmen jumys isteıtin kompanııalar sany 1 157-ge teńeldi.

Sondaı-aq, taıaýda ótken Qazaqstan men Ózbekstannyń bıznes-forýmy barysynda qos eldiń kásipkerleri quny 71 mln dollar bolatyn kelisimshartqa qol qoıdy.