OA elderi Qytaı Memlekettik basqarý akademııalarymen yntymaqtastyqty nyǵaıtýda
BEIJІŃ. KAZINFORM - Beıjińde Qytaı jáne Ortalyq Azııa elderi: Qazaqstan, Ózbekstan, Túrikmenstan, Qyrǵyzstan jáne Tájikstannyń memlekettik basqarý akademııalary basshylary qatysýymen semınar ótti.
Onda jınalǵandar memlekettik basqarý salasyndaǵy Qytaı tájirıbesimen, onyń ishinde ınnovatsııalyq jobalarmen tanysyp, birlesken bastamalar keleshegin talqylady.
Sapardyń alǵashqy kúni Astana memlekettik qyzmet haby Basqarýshy komıtetiniń tóraǵasy Álıhan Baımenovtiń Qytaı Ulttyq basqarý akademııasy birinshi vıtse-prezıdenti Lı I myrzamen resmı kezdesýi ótti.
Lı I byltyr qurylǵan Memlekettik basqarý akademııalary jelisi tájirıbe almasý jáne qatysýshylardyń áleýetin arttyrýda mańyzy joǵary ekenin aıtty. Sondaı-aq memlekettik basqarý men memlekettik qyzmet salasyndaǵy moıyndalǵan tuǵyrnama retinde Astana memlekettik qyzmet habynyń osy qaýymdastyqtaǵy erekshe rólin atap ótti.
Álıhan Baımenov óz kezeginde akademııalar jelisi «udaıy tájirıbe men bilim almasatyn jaqsy ınstıtýtsıonaldyq negiz» ekendigin aıta otyryp, byltyrǵy bastamalardyń belsendi túrde iske asyrylyp jatqanyn jetkizdi.
Bıyl Qazaqstanǵa atqarýshy vıtse-prezıdent Sı Chýntao bastaǵan Qytaı Ulttyq basqarý akademııasy delegatsııasy, sondaı-aq Gansý provıntsııalary men Shyńjań Óndiristik-qurylys korpýsy Memlekettik basqarý akademııalary jetekshiligi men professorlary kelgen.
Ekinshi kúni «Basqarýshylyq áleýetti modernızatsııalaý boıynsha birlesken jumys» atty semınar ótip, onda Qytaı jáne Ortalyq Azııanyń barlyq elderi memlekettik basqarý akademııalary basshylary, sondaı-aq Astana memlekettik qyzmet haby ókilderi óz oılaryn ortaǵa saldy.
Sapar baǵdarlamasy aıasynda delegatsııalar Hanchjoý qalasy Memlekettik basqarý akademııasy, «Hanchjoý qalalyq mıy» basqarý platformasy, sondaı-aq QHR-nyń eki iri tsıfrlyq kompanııasy qyzmetimen tanysty.
iFLYTEK kompanııasy (Beıjiń) sınhrondy aýdarma, bilim berý, medıtsına salasyndaǵy jasandy ıntellekt qoldaný jobalaryn qatysýshylar nazaryna usyndy.
«AliBaba» kompanııasy (Hanchjoý) 25 jyldaǵy elektrondy kommertsııadan bastap medıtsına, týrızm, bilim berýge deıingi jáne basqa da salalardaǵy jetistikterimen tanystyrdy.
Chjetszıan provıntsııasyndaǵy Tszınshan jáne Sıaogýchen aýyldary jergilikti ózin-ózi basqarý men aýyldardy qaıta jańǵyrtý boıynsha ozyq mysaldarmen tanystyrdy.
2023 jyly Beıjińde Qytaı-Ortalyq Azııa memlekettik basqarý akademııalar jelisin qurý týraly kelisimge qol qoıylǵan. Oǵan 6 memlekettiń - Qytaı, Qazaqstan, Qyrǵyzstan, Ózbekstan, Tájikstan jáne Túrikmenstan memlekettik basqarý akademııalary, sondaı-aq Astana memlekettik qyzmet haby kirgen. Jeliniń maqsaty - kadrlardy daıarlaý men qaıta daıarlaýdy qosa alǵanda, memlekettik basqarýdy transformatsııalaý salasynda tájirıbe men bilim almasý.
