Ortalyq Azııa elderi Qazaqstannyń sý salasyndaǵy bastamalaryn talqylady
ASTANA. KAZINFORM – Dýshanbede Ortalyq Azııanyń Memleketaralyq sý sharýashylyǵyn úılestirý komıssııasynyń 92-inshi otyrysy ótti.
Jıynǵa Qazaqstan Respýblıkasynyń Sý resýrstary jáne ırrıgatsııa mınıstri Nurjan Nurjigitov, Tájikstan Respýblıkasynyń Energetıka jáne sý resýrstary mınıstri Daler Djýma, Túrikmenstannyń Memlekettik sý sharýashylyǵy komıtetiniń tóraǵasy Dýrdy Gendjıev, Ózbekstan Respýblıkasynyń Sý sharýashylyǵy mınıstri Shavkat Hamraev qatysty. Qyrǵyz Respýblıkasynan baqylaýshy retinde Qyrǵyz Respýblıkasynyń Tájikstandaǵy Elshiliginiń keńesshisi Ýlan Abdykerımov boldy.
Otyrysta 2025-2026 jyldardaǵy vegetatsııaaralyq kezeńde Syrdarııa jáne Ámýdarııa ózenderi basseınderindegi sý alý lımıtteri men sý qoımalarynyń jumys rejımderi qaraldy. Sonymen qatar Araldy qutqarý halyqaralyq qory quryltaıshy memleketteri basshylary sammıtterinde qabyldanǵan sheshimderdi iske asyrý barysy talqylandy.
QR Sý resýrstary jáne ırrıgatsııa mınıstri Nurjan Nurjigitov Qazaqstan Prezıdenti Qasym-Jomart Toqaev usynǵan sý salasyndaǵy bastamalar júıeli túrde júzege asyrylyp jatqanyn atap ótti.
– Bul bastamalar ulttyq reformalardy úılestirýge, sýdy esepke alýdyń ashyq júıesin damytýǵa jáne derektermen júıeli almasýǵa, sondaı-aq óńirlik tetikterdiń tıimdiligin arttyrýǵa baǵyttalǵan. Memleket basshysy Ortalyq Azııada sý paıdalanýǵa qatysty Ramalyq konventsııa qabyldaýdy usyndy. Bul bastama óńirlik úılestirýdi nyǵaıtýǵa, klımattyń ózgerýine beıimdelý jolyndaǵy kúsh-jigerdi biriktirýge jáne sý resýrstaryn turaqty basqarýdy ilgeriletýge múmkindik beredi. Osyǵan baılanysty taraptardy atalǵan bastamany qoldaýǵa shaqyramyn, – dedi mınıstr.
Nurjan Nurjigitov sondaı-aq áriptesterin 22–24 sáýir kúnderi Astanada ótetin Óńirlik ekologııalyq sammıtke belsendi qatysýǵa shaqyrdy. Sammıt aıasynda Sý resýrstary jáne ırrıgatsııa mınıstrligi «Ortalyq Azııadaǵy sý resýrstaryn turaqty basqarý: bastamalardan birlesken is-qımylǵa» jáne «Klımattyń ózgerýi jaǵdaıynda Ortalyq Azııada sý resýrstaryn paıdalaný tıimdiligin arttyrý» taqyryptarynda eki arnaıy sessııa uıymdastyrady.
MSShÚK-nyń 93-inshi otyrysyn 2026 jyldyń sáýir aıynda Ózbekstanda ótkizý josparlanyp otyr.
Aıta keteıik, Qyzylorda oblysynda 10 mektepte «Sý klýbtary» ashyldy.