Ortalyq Azııa elderi qazaqstandyq astyqty kóbirek satyp ala bastady
ASTANA. KAZINFORM — Qazaqstan temir jolynyń málimetinshe, 2025 jylǵy qyrkúıekten 2026 jylǵy 17 shildege deıingi aralyqta astyq pen astyqqa shaqqandaǵy un eksporty 13,5 mln tonnaǵa jetti.
Bul ótken jyldyń sáıkes kezeńimen salystyrǵanda 16%-ǵa joǵary. Ótken maýsymda syrtqy naryqtarǵa 12 mln tonna ónim eksporttalǵan bolatyn.
Eksport kóleminiń ósýine Ortalyq Azııa elderi men Aýǵanstandaǵy dástúrli naryqtardaǵy joǵary suranys negizgi serpin berdi.
Atap aıtqanda, Ózbekstanǵa eksport 37%-ǵa ósip, 5,6 mln tonna boldy. Qyrǵyzstanǵa eksport kólemi 1,4 esege artyp, 504 myń tonnaǵa jetti. Aýǵanstanǵa jóneltilgen ónim kólemi 59%-ǵa ósip, 2,2 mln tonnany, al Túrikmenstanǵa eksport 34%-ǵa ulǵaıyp, 210 myń tonna boldy.
Júk tasymaly kórsetkishteriniń oń ósimi qazaqstandyq aýyl sharýashylyǵy ónimderine suranystyń joǵary ekenin aıǵaqtaıdy. Sondaı-aq bul eksporttyq logıstıkany damytý jáne sheteldik seriktestermen saýda-ekonomıkalyq yntymaqtastyqty keńeıtý baǵytynda qolǵa alynǵan sharalardyń nátıjeli ekenin kórsetedi.
Aıta ketelik Azyq-túlik korporatsııasy bıyl agrarshylardy qoldaýǵa 65,7 mlrd teńge bóletini týraly jazǵan edik.
