Ortalyq Azııa elderi Qaýipsizdik keńesteriniń hatshylary Ózbekstanda bas qosty

TAShKENT. KAZINFORM — Ortalyq Azııa elderi Qaýipsizdik keńesteriniń hatshylary Samarqandta bas qosty, dep habarlaıdy Kazinform agenttiginiń menshikti tilshisi. 

UzA aqparat agenttiginiń málimetinshe, Qaýipsizdik keńesteriniń hatshylary terrorızm, ekstremızm, radıkalızm jáne transulttyq qylmystarǵa qarsy turý baǵytyndaǵy jumystardyń oryndalýyna toqtalyp, keleshek josparlardyń barysyn pysyqtady. Іs-shara bıyl qyrkúıekte Ózbekstanda ótetin Ortalyq Azııa memleketteri basshylarynyń konsýltatıvtik kezdesýi qarsańynda uıymdastyryldy.

— Ózbekstan Ortalyq Azııa memleketteri basshylarynyń konsýltatıvtik kezdesýine tóraǵalyq ete otyryp, óńirlik yntymaqtastyqqa asa mán bermek. Atap aıtqanda, qaýipsizdikti nyǵaıtý, saýda-ekonomıkalyq baılanystardy tereńdetý, kólik-logıstıkalyq jobalardy iske asyrý jáne ózge de ózekti máseleler boıynsha tıimdi sheshim izdeýge kúsh salady, — delingen Ózbekstan prezıdenti Shavkat Mırzıeevtiń atalǵan forým qatysýshylaryna arnalǵan hatynda.

Sonymen qatar Qaýipsizdik keńesteriniń hatshylaryna byltyr Astanada ótken Ortalyq Azııa memleketteri basshylarynyń konsýltatıvtik kezdesýinde Shavkat Mırzıeev usynǵan bastama negizinde ázirlengen Óńirlik qaýipsizdik pen turaqtylyqty qamtamasyz etý tujyrymdamasynyń jobasy tanystyryldy.

Otyrys qorytyndysy boıynsha tıisti hattama qabyldandy, sondaı-aq taraptar yntymaqtastyqty ilgeriletýge ýaǵdalasty.

Qosa keteıik, 16 sáýirde Prezıdent Qasym-Jomart Toqaevtyń tóraǵalyǵymen Qaýipsizdik Keńesiniń jumys otyrysy ótti. Jıynda Memleket basshysy qazirgi jahandyq ekonomıkadaǵy ahýaldyń turaqsyz sıpat ala bastaǵanyn, sondyqtan kez kelgen jaǵdaıǵa daıyn bolý qajet ekenin atap ótti.