Ortalyq Azııa elderi qaýipsizdik keńesteri hatshylarynyń birinshi kezdesýi ótti

ASTANA. KAZINFORM - Astana qalasynda Ortalyq Azııa elderi qaýipsizdik keńesteri hatshylarynyń birinshi otyrysy ótti. Basqosýǵa Qazaqstan Respýblıkasy Qaýipsizdik Keńesiniń Hatshysy Ǵızat Nurdáýletov qatysty, dep habarlaıdy Aqordanyń baspasóz qyzmeti. 

Jıyn barysynda óńirlik jáne halyqaralyq qaýipsizdiktiń ózekti máseleleri, sonyń ishinde sý-energetıkalyq jáne azyq-túlik qaýipsizdigi salalaryndaǵy yntymaqtastyqty damytý isi jan-jaqty qarastyryldy.

Sonymen qatar taraptar Ortalyq Azııa elderiniń kólik qaýipsizdigi men kólik-logıstıka áleýetin damytý aspektilerin talqylady.

Qazaqstan Respýblıkasy Qaýipsizdik Keńesiniń Hatshysy áriptesterine atalǵan máseleler boıynsha elimizdiń ustanymy týraly málimet berdi. Sondaı-aq transshekaralyq ózenderdiń resýrstaryn tıimdi basqarý, sýdy teńdeı ári ádil paıdalaný qaǵıdattaryna negizdelgen biriktirilgen sý saıasatyn ázirleý jáne ony júzege asyrý, ózara mindettemelerdi múltiksiz oryndaý jónindegi yntymaqtastyqty damytýǵa qatysty birqatar usynys aıtty.

Ortalyq Azııadaǵy azyq-túlik qaýipsizdigin qamtamasyz etýdiń ortaq strategııalyq tásilderin qalyptastyrý, sondaı-aq aımaqtyń ekonomıkalyq baılanystaryn nyǵaıtý maqsatynda kólik dálizderin odan ári damytý qajet ekeni atap ótildi.

Birinshi kezdesýdiń qorytyndysy boıynsha taraptar óńirlik qaýipsizdikti nyǵaıtý salasyndaǵy tyǵyz yntymaqtastyqty jalǵastyrýǵa daıyn ekenin bildirdi.