Ortalyq Azııa elderi ekologııalyq volonterlikti damytý jóninde rezolıýtsııa qabyldady
ASTANA. KAZINFORM — «Qorshaǵan ortaǵa qamqorlyqpen qaraý yntymaqtastyqty arttyra túsetin qýatty faktorǵa aınaldy»: Prezıdent ÓES aıasyndaǵy ekovolonterlik jónindegi sessııa qatysýshylaryna úndeý joldady. Bul týraly Mádenıet jáne aqparat mınıstrligi málim etti.
Qasym-Jomart Toqaevtyń bastamasymen jarııalanǵan Halyqaralyq eriktiler jyly sheńberinde «Volonterlik jáne ekologııalyq is-qımyldar» atty paneldik sessııa ótti. Sessııa jumysyna QR Premer-Mınıstriniń orynbasary — Mádenıet jáne aqparat mınıstri Aıda Balaeva, BUU Bas hatshysynyń orynbasary — BUU Damý baǵdarlamasy Ákimshisiniń orynbasary Haolıan Shý, Ázerbaıjannyń ÚEU-lardy memlekettik qoldaý agenttiginiń tóraǵasy Aıgıýn Alıeva, sondaı-aq sarapshylar qaýymdastyǵynyń ókilderi qatysty.
Sessııaǵa Qazaqstan, Ázerbaıjan, Qyrǵyzstan, Tájikstan, Túrikmenstan jáne Ózbekstannan kelgen 100-den astam belsendi volonter men azamattyq qoǵam kóshbasshylary jınaldy. Talqylaýdyń negizgi taqyryby óńirdegi ekologııalyq syn-qaterlerdi sheshýdegi volonterliktiń róli boldy. Qatysýshylarǵa Memleket basshysy quttyqtaý joldady. Qasym-Jomart Toqaevtyń úndeýin Premer-Mınıstrdiń orynbasary Aıda Balaeva oqyp berdi.
— Qazaqstanda ekovolonterler qozǵalysy keń qanat jaıyp keledi. Ortaq iske 100 myńnan astam jasampaz ári otanshyl azamatymyz atsalysyp júr. Elimizde ozyq ekologııalyq oılaý mádenıetin damytatyn «Taza Qazaqstan» jalpyulttyq jobasy iske asyrylyp jatyr. Jaqynda jalpyhalyqtyq referendýmda qabyldanǵan elimizdiń jańa Konstıtýtsııasynda tabıǵatty aıalaý jáne volonterlik qyzmet qoǵam damýynyń negizgi ustanymdarynyń biri retinde kórsetildi. Qorshaǵan ortaǵa qamqorlyqpen qaraý birlese ósip-órkendeýge umtylǵan aımaq elderiniń de, búkil halyqaralyq qaýymdastyqtyń da yntymaǵyn arttyra túsetin qýatty faktorǵa aınaldy, — delingen Prezıdenttiń qatysýshylarǵa arnaǵan úndeýinde.
Aıda Balaeva Qazaqstandaǵy volonterlikti qoldaý sharalaryna arnaıy toqtaldy. Atap aıtqanda, bul baǵyttaǵy jumys úsh jyldyq Jol kartasy aıasynda júıeli túrde jolǵa qoıylǵany aıtyldy. Budan bólek, «Volonterlik qyzmet týraly» Zań qoldanysta.
— Qazaqstan Úkimeti Memleket basshysy aıqyndap bergen baǵytty turaqty túrde jalǵastyra beredi. Volonterlik qaýymdastyqpen birlesip, 2030 jylǵa deıingi volonterlik qozǵalysty damytý tujyrymdamasyn ázirleýge kiristik. Barlyq óńirde fokýs-toptar men zertteý jumystary júrgizilýde. Halyqaralyq tájirıbe men úzdik praktıkalar zerdelenip jatyr. Atap aıtqanda, volonterlik qyzmetti jumysqa ornalasý kezinde, oqý oryndaryna túsý barysynda esepke alý, sondaı-aq volonterlerdiń ómirin saqtandyrý máseleleri qarastyrylýda. Osy bastamalardy iske asyrý úshin tıisti zańnamalyq túzetýler qabyldaý josparlanyp otyr, — dedi Aıda Balaeva.
Úkimet basshysynyń orynbasary Memleket basshysynyń tapsyrmasymen ekologııalyq volonterlikti damytý baǵdarlamasy ázirlenip jatqanyn da atap ótti. Búginde ekologııalyq qozǵalys el boıynsha 100 myńnan astam azamatty biriktirip otyr. Sońǵy bir jyl ishinde myńnan astam is-shara ótkizilip, 10 myń tonna qoqys jınaldy, 2 mıllıonǵa jýyq aǵash pen buta otyrǵyzyldy. Keıingi bes jylda 10 myń volonterdiń qatysýymen Aral teńiziniń qurǵaǵan tabanynda 1 mıllıon gektar aýmaqqa sekseýil egý jumystary júrgizildi.
Paneldik sessııa qorytyndysy boıynsha ekologııalyq volonterlikti damytý jónindegi Ortalyq Azııa elderiniń rezolıýtsııasy qabyldandy. Qujatty BUU shtab-páterine joldaý josparlanyp otyr. Sonymen qatar alań aıasynda Mańǵystaý oblysynda «Caspian Sea Action Week 2026» jáne Qyzylorda oblysynda «Green Aral: Volunteers for Life» ekologııalyq jobalaryn birlesip iske asyrý týraly kelisimderge qol qoıyldy.
Aıta keteıik, buǵan deıin Aıda Balaeva «halyqaralyq volonterler jyly naqty jetistikter kezeńine aınalady» degen bolatyn. Onyń aıtýynsha, árbir úshinshi qazaqstandyq volonterlik bastamalarǵa qatysyp otyr.
