Ortalyq Azııa elderi azyq-túlik qaýipsizdigi jónindegi birlesken deklaratsııaǵa qol qoıdy
TAShKENT. KAZINFORM — Ortalyq Azııa elderi aýyl sharýashylyǵy mınıstrleriniń alǵashqy kezdesýinde aımaqtyq yntymaqtastyqty nyǵaıtý, turaqty aýyl sharýashylyǵyn damytý jáne azyq-túlik qaýipsizdigin qamtamasyz etý máseleleri talqylandy. Bul týraly AShM málim etti.
Іs-sharaǵa salalyq vedomstvolar basshylary, dıplomatııalyq korpýs pen halyqaralyq uıymdar ókilderi qatysty.
Qazaqstan delegatsııasyn Aýyl sharýashylyǵy vıtse-mınıstri Erbol Tasjúrekov bastap bardy.
Óz sózinde Memleketter basshylarynyń birlesken kúsh-jigeriniń arqasynda Ortalyq Azııa elderi arasyndaǵy qatynastar jańa deńgeıge kóterilgenine toqtalyp, agrarlyq saladaǵy áriptestikti nyǵaıtýdyń mańyzdylyǵyn erekshe atap ótti.
Vıtse-mınıstr Qazaqstanda júrgizilip jatqan agroónerkásiptik saıasatqa da nazar aýdardy. Elde egis alqaptaryn ártaraptandyrý belsendi túrde júzege asyrylýda. Maıly daqyldardyń egis kólemi 1 mln gektarǵa, burshaq daqyldarynyń kólemi 300 myń gektarǵa ulǵaıǵan.
Sýarmaly eginshilik te damyp keledi. Sońǵy eki jylda sý únemdeý tehnologııalary qoldanylatyn jerler kólemi eki esege ósip, 590 myń gektarǵa jetti. 2030 jylǵa qaraı bul kórsetkishti 1,3 mln gektarǵa deıin jetkizý josparlanyp otyr.
Salany qoldaý men jańǵyrtýdyń arqasynda Qazaqstan eki jyl qatarynan astyq pen maıly daqyldardyń rekordtyq ónimin alýda.
Aǵymdaǵy jyldyń qańtar–qyrkúıek aılarynda Qazaqstan men Ortalyq Azııa elderi arasyndaǵy agroónerkásiptik ónimderdiń taýar aınalymy 2,3 mlrd AQSh dollaryn qurap, ótken jylmen salystyrǵanda 24,4%-ǵa artqan.
— Eksporttyń negizgi bóligin bıdaı, un, ósimdik maıy, sıyr eti jáne qant quraıdy, al ımportqa negizinen kókónister men jemister kiredi, — delingen habarlamada.
Kezdesý barysynda taraptar kólik, energetıkalyq jáne ınnovatsııalyq ınfraqurylymdy damytý, sondaı-aq shekara mańyndaǵy logıstıkalyq habtardy qurý máselelerin talqylady.
Qazaqstan óz tarapynan tabysty jobalar retinde Ózbekstanmen shekarada ornalasqan «Ortalyq Azııa» ónerkásiptik yntymaqtastyqtyń halyqaralyq ortalyǵyn jáne Qyrǵyzstanmen shekaradaǵy «Alataý» ındýstrııalyq-logıstıkalyq keshenin usyndy.
— Qazaqstan Respýblıkasy Prezıdenti Qasym-Jomart Toqaevtyń bastamasymen ázirlengen 2030 jylǵa deıingi Ortalyq Azııanyń azyq-túlik qaýipsizdigi jónindegi birlesken deklaratsııasy men is-qımyl josparyna qol qoıylýy-osy kezdesýdiń basty nátıjesi deýge bolady, — dep habarlady vedomstvodan.
Bul qujat agrarlyq saıasat salasyndaǵy is-qımyldardy úılestirýdi kúsheıtýge jáne óńirlik ıntegratsııany damytýǵa baǵyttalǵan.
Sondaı-aq, Prezıdent Toqaev usynǵan Turaqty eginshilik jónindegi óńirlik ortalyq qurý bastamasy talqylandy. Bul ortalyq aımaq elderi úshin tájirıbe almasý men álemdik úzdik tájirıbelerdi engizý alańyna aınalmaq.
Basqosý qorytyndysy boıynsha taraptar yntymaqtastyqty keńeıtýge jáne birlesken jobalardy iske asyrýǵa daıyn ekendikterin jetkizdi.
— Kezdesý nátıjeleri aýyl sharýashylyǵynyń damýyna jańa serpin berip, memleketterimiz arasyndaǵy ekonomıkalyq baılanystardy nyǵaıtady. Bizdiń basty maqsatymyz — turaqty, qaýipsiz jáne ınnovatsııalyq agroóndiristi damytý, — dedi Erbol Tasjúrekov.
Aıta keteıik, buǵan deıin elde egin jınaý naýqany aıaqtalǵanyn jazǵan edik.