Ortalyq Azııa elderi arasynda ETsQ-ny ózara taný usynyldy
ASTANA. KAZINFORM – Transshekaralyq tólemderdi jeńildetý jáne elektrondyq tsıfrlyq qoltańbany (ETsQ) ózara taný Ortalyq Azııa elderiniń tsıfrlyq ıntegratsııasyn damytýǵa baǵyttalǵan bıznes usynystarynyń biri boldy. Bul máseleler búgin Astanada ótken óńirlik dóńgelek ústelde talqylandy.
Ortalyq Azııa fınteh qaýymdastyǵynyń tóraǵasy Otabek Nasırovtyń aıtýynsha, búginde kompanııalar kórshiles elderdiń naryǵyna shyǵý kezinde tsıfrlyq kedergilerge tap bolady.
– Tsıfrlyq ekonomıka týraly aıtqanda, eń aldymen transshekaralyq tólemderdi jeńildetý qajet. Ekinshiden, elektrondyq tsıfrlyq qoltańbalardy ózara taný máselesin sheshýimiz kerek. Bul bıznes úshin óte mańyzdy, – dedi ol.
Sondaı-aq elektrondyq shot-faktýralarmen jumysty jeńildetý jáne derbes derekterdi qorǵaý talaptaryn buzbaı, elder arasynda qajetti aqparat almasýǵa múmkindik beretin tehnologııalyq sheshimder ázirleý usynyldy.
Otabek Nasırov mysal retinde Qazaqstandaǵy satýshynyń Ózbekstandaǵy marketpleıste jeke kabınet ashý jaǵdaıyn keltirdi. Tirkelý úshin ol tsıfrlyq sáıkestendirýden ótýi kerek. Alaıda eki eldiń elektrondyq tsıfrlyq qoltańbasy ár eldiń ulttyq júıesi aıasynda jumys isteıdi.
– Biz azamattardyń derbes derekteri týraly zańnamany buzbaı, úkimetter ózara kelisken jaǵdaıda qajetti aqparat almasýǵa múmkindik beretin alǵysharttar jasaǵymyz keledi. Osylaısha, azamattar jumys istegisi keletin platformalarda kedergisiz tirkele alar edi, – dep túsindirdi ol.
Usynylyp otyrǵan tásil ár eldiń ulttyq tsıfrlyq júıesi men zańnamasyn saqtaı otyryp, olardyń ózara úılesimdi jumys isteý tetikterin qalyptastyrýdy kózdeıdi. Bastamashylardyń pikirinshe, bul fınteh kompanııalarynyń, elektrondyq saýdaǵa qatysýshylardyń jáne óńirdegi tsıfrlyq platformalarda jumys isteıtin satýshylardyń qyzmetin jeńildetýge múmkindik beredi.
Buǵan deıin dóńgelek ústelde Ortalyq Azııa elderiniń bıznes jáne sarapshylar qaýymdastyǵy ókilderi óńirdiń tsıfrlyq ıntegratsııasy jónindegi úkimetaralyq kelisim jobasyn talqylady. Qujat biryńǵaı zańnama nemese ulttyq organdardan joǵary turatyn biryńǵaı retteýshi qurmaı-aq, bes eldiń tsıfrlyq júıeleriniń ózara úılesimdiligin damytýǵa baǵyttalǵan.
Buǵan deıin Qazaqstannyń IT-eksporty 1,1 mlrd dollarǵa jetkenin jazǵan edik.
