Ortalyq Azııa búginde klımattyq ózgeristerdiń dál ortasynda tur – Batyr Mamedov
ASTANA. KAZINFORM – Ortalyq Azııa óńiriniń jylyný qarqyny álemdik ortasha kórsetkishten 2 ese joǵary. Bul týraly Óńirlik ekologııalyq forýmnyń taqyryptyq sessııasynda Ortalyq Azııanyń óńirlik ekologııalyq ortalyǵynyń atqarýshy dırektory Batyr Mamedov aıtty.
- Ortalyq Azııa búginde klımattyq ózgeristerdiń dál ortasynda tur. Óńirimizdegi jylyný qarqyny álemdik ortasha kórsetkishten eki ese joǵary. Biz onyń saldaryn kún saıyn kórip otyrmyz. Jerdiń tozýy qazirdiń ózinde aýmaqtarymyzdyń 80 paıyzyn qamtydy. Bul jyl saıyn elder ekonomıkasyna jalpy ishki ónimniń shamamen 6 paıyzyna teń shyǵyn ákeledi. Bul – turaqsyz ótkenniń óte úlken quny. Biraq búgin biz turaqty bolashaqty qurý úshin jınalyp otyrmyz, - dedi ol.
Onyń aıtýynsha, Ortalyq Azııanyń óńirlik ekologııalyq ortalyǵynyń mıssııasy árdaıym elder arasyndaǵy kópir bolý edi. Al búginde bul kópir deklaratsııalar kezeńinen naqty óńirlik yntymaqtastyq kezeńine ótýdi baılanystyryp otyr.
- Bizdiń sessııa – saıası erik-jigerdiń arqasynda qalpyna keltirilgen ormandar men myńdaǵan adamnyń qorǵalǵan ómirin pash etetin alań. Ortalyq Azııadaǵy osynaý ózgeristerdiń negizgi quraly «Ortalyq Azııadaǵy turaqty landshaftardy qalpyna keltirý baǵdarlamasy» boldy. Dúnıejúzilik bank pen halyqaralyq seriktesterdiń qoldaýynyń arqasynda turaqty egin sharýashylyǵy 470 myń gektardan astam aýmaqta engizildi. Bul jaı ǵana statıstıka emes. Bul - 300 myńnan astam azamatymyzdy selden, sý tasqynynan jáne shańdy daýyldan tikeleı qorǵaıtyn naǵyz qalqan. Ózbekstan, Qyrǵyzstan jáne Tájikstan túıisken jerde transshekaralyq beıbitshilik parkiniń qurylýy tabıǵattyń shekara tanymaıtynyn kórsetedi. Al ony basqarý shyn máninde birtutas sıpatqa ıe bola bastady, - dedi Batyr Mamedov.
Buǵan deıin BUU-nyń Apattar táýekelin azaıtý jónindegi Eýropa jáne Ortalyq Azııa óńirlik keńsesiniń basshysy Natalıa Alonso Kano Ortalyq Azııanyń transshekaralyq landshaftaryn qalpyna keltirý apat táýekelderin azaıtýdyń negizgi strategııasy ekenin aıtqan edi.