Ortalyq Azııa aýqymdy transformatsııa kezeńin ótkerip jatyr — Prezıdent

TAShKENT. KAZINFORM — Qasym-Jomart Toqaev Ortalyq Azııa memleketteri basshylarynyń VII Konsýltatıvtik kezdesýine qatysty. Bul týraly Aqordanyń baspasóz qyzmeti habarlady. 

Memleket basshysy sóz basynda qonaqjaılyq tanytyp, Sammıtti joǵary deńgeıde uıymdastyrǵany úshin Ózbekstan Prezıdenti Shavkat Mırzıeevke alǵys aıtty.

Qasym-Jomart Toqaev Ilham Álıevke iltıpat bildirip, Ázerbaıjannyń atalǵan keńeske tolyq múshe retinde qosylýyn tarıhı sheshim dep baǵalady. Sondaı-aq Bakýdiń jańa statýsta aımaq yntymaqtastyǵyn keńeıtýge aıtarlyqtaı úles qosatynyna senim artty.

Prezıdent Ortalyq Azııa memleketteri basshylarynyń Konsýltatıvtik kezdesýleri óz tıimdiligin dáleldegenin aıtty.

– Qazir Ortalyq Azııa aýqymdy transformatsııa kezeńin ótkerip jatyr. Jabyq shekaralar men oqshaýlanýdyń ýaqyty ótti. Muny senimmen aıtýǵa bolady. Ortaq kúsh-jigerdiń arqasynda óńirdiń ishki birligi artty. Bul elderimizdiń damýyna jáne halyqaralyq yntymaqtastyqqa keńinen jol ashty. Álemniń aldyńǵy qatarly memleketteri óńirdiń jahandyq úderisterde mańyzdy ról atqaratynyn moıyndaıdy. Sondyqtan «Ortalyq Azııa plıýs» formatyna qyzyǵýshylyq artyp keledi. Buǵan bıyl negizgi sheteldik seriktestermen ótken sammıtter dálel bola alady. Meniń oıymsha, mundaı seriktestiktiń basty maqsaty – óńirdegi turaqtylyqty nyǵaıtý jáne ornyqty progress úshin jaǵdaı jasaý, elderimiz ben halyqtarymyzdyń ál-aýqatyn, baqýatty turmysyn qamtamasyz etý. Ortalyq Azııanyń áleýmettik-ekonomıkalyq turǵydan qarqyndy damyǵan ári jan-jaqty yntymaqtastyq pen beıbitshilik ornaǵan berekeli óńir retindegi mártebesin nyǵaıtýdy kózdeımiz, – dedi Prezıdent. 

Aıta ketelik Qasym-Jomart Toqaev Ortalyq Azııa memleketteri basshylarynyń VII konsýltatıvtik kezdesýine qatysý úshin Tashkenttegi Kongress ortalyqqa barǵanyn jazǵan edik.