Ortalyq Azııa álemdik ekonomıkanyń jańa ósý núktesine aınaldy — Kósherbaev
ASTANA. KAZINFORM – Qazaqstan Respýblıkasynyń Syrtqy ister mınıstri Ermek Kósherbaev «Ortalyq Azııa — Germanııa» (S5+1) formatyndaǵy syrtqy ister mınıstrleriniń kezdesýine qatysty. Bul týraly SІM baspasóz qyzmeti habarlady.
— Ortalyq Azııa álemdik ekonomıkanyń jańa ósý núktesine aınaldy. Onyń halyqaralyq sýbektiligi men jahandyq úderisterdegi róli artyp keledi. «Ortalyq Azııa — Germanııa» formatyn ortaq syn-qaterlerge birlesken jaýaptar ázirleý jáne búkil óńirdiń ıgiligine baǵyttalǵan naqty jobalardy iske asyrý úshin strategııalyq platforma retinde qarastyramyz», — dedi Qazaqstan syrtqy saıası vedomstvosynyń basshysy óz sózinde.
Qazaqstan syrtqy saıası vedomstvosynyń basshysy óz sózinde Germanııamen saýda-ekonomıkalyq ózara is-qımyldy keńeıtýge, german ınvestıtsııalaryn tartýǵa jáne ónerkásiptik kooperatsııany damytýǵa múddelilikti rastady. Germanııanyń jetekshi tehnologııalyq seriktes ári mańyzdy ınvestor retindegi róli, sondaı-aq energetıka salasyndaǵy, onyń ishinde energııa resýrstaryn jetkizý, «jasyl» energetıkany damytý jáne dekarbonızatsııa jobalary boıynsha yntymaqtastyqtyń perspektıvalary erekshe atalyp ótti.
QR SІM basshysy Qazaqstannyń Eýropa men Azııa arasyndaǵy negizgi tranzıttik torap retindegi artyqshylyqtaryna nazar aýdaryp, ornyqty kólik-logıstıkalyq dálizderdi, onyń ishinde Orta dálizdi damytý máseleleri boıynsha Germanııamen yntymaqtastyqty tereńdetýge qyzyǵýshylyq bildirdi.
Sonymen qatar kezdesý barysynda Ortalyq Azııanyń strategııalyq turaqtylyq óńiri ekeni atalyp ótti. Qazaqstan úshin óńirlik yntymaqtastyqty nyǵaıtý — syrtqy saıasattyń basymdyǵy, al Germanııamen ózara is-qımyl — ornyqty damýdy qamtamasyz etý, sý resýrstaryn basqarý jáne transshekaralyq táýekelderdiń aldyn alý turǵysynan mańyzdy baǵyt.
Qazaqstan klımattyq kún tártibine beıildiligin rastap, qorshaǵan ortany qorǵaý, klımattyń ózgerýine beıimdelý, tabıǵı resýrstardy utymdy paıdalaný jáne ekologııalyq taza tehnologııalardy engizý salalarynda Germanııamen yntymaqtastyqty keńeıtýge múddelilik bildirdi.
Gýmanıtarlyq ólshemdi damytýǵa, onyń ishinde bilim berý, ǵylym, kadrlardy kásiptik daıarlaý jáne akademııalyq almasýlarǵa erekshe nazar aýdaryldy.
Plenarlyq kezdesýdiń qorytyndysy boıynsha qatysýshylar «Ortalyq Azııa — Germanııa» formatyn naqty bastamalarmen jáne praktıkalyq jobalarmen odan ári tolyqtyrýǵa múddeliligin rastady.
Aıta ketelik Ermek Kósherbaev AQSh-ta G20 sammıtine Qazaqstannyń qatysýy boıynsha daıyndyq máselelerin talqylaǵan edi.