Ortalyq áskerı orkestrdiń mýzykanttary qazaqstandyqtardy Naýryz merekesimen quttyqtady
ASTANA. KAZINFORM — Naýryz meıramy qarsańynda Ulttyq áskerı-patrıottyq ortalyǵy Ortalyq áskerı orkestriniń áskerı qyzmetshileri «Han shatyr» saýda oıyn-saýyq ortalyǵynda aıryqsha mýzykalyq qoıylym uıymdastyrdy.
Merekelik aktsııa elorda turǵyndary men qonaqtaryna tamasha tartý boldy. Ortalyq áskerı orkestrdiń áskerı dırıjeri, leıtenant Abzal Imanǵalıevtiń aıtýynsha mundaı qoıylymdar jaqsy dástúrge aınalǵan.
— Naýryz — jańarý, izgilik pen kelisim merekesi. Adamdarǵa mýzyka arqyly qýanysh syılap, júrekterdi tabystyryp, ortaq qundylyqtarymyzdy eske salý — biz úshin úlken mártebe, — dep atap ótti ol.
Áskerı orkestrdiń oryndaýynda klassıkalyq shyǵarmalarmen qatar, tanymal qazaq jáne sheteldik kompozıtsııalar shyrqalyp, kópshilikke merekelik kóńil kúı tartý etildi. Pogon taqqan mýzykanttardyń oılamaǵan jerden saýda ortalyǵynda paıda bolýy kelýshilerge naǵyz tosynsyı boldy. Kórermender olardy jyly qarsy alyp, telefondaryna túsirip, zor qoshemet kórsetti.
Ǵalııa Baızaqova elordaǵa Arqalyqtan ájeler baıqaýyna qatysý úshin kelgen.
— Men «Altyn áje» baıqaýynda bas júlde jeńip aldym. Nemeremmen serýendep júrip, osy kontsertke kezdeısoq tap boldym. Ásirese olardyń kelbeti, aspaptardyń úni, jalpy atmosfera, bári-bári unady. Áskerı formadaǵy er azamattar árdaıym óte symbatty kórinedi. Osyndaı qýanysh pen shynaıy merekelik kóńil kúı syılaǵany úshin áskerı mýzykanttarǵa alǵys aıtamyn, — dep alǵan áserimen bólisti Ǵ. Baızaqova.
Qurmet qaraýyl rotasynyń defılesi baǵdarlamaǵa erekshe kórik berdi. Naqty, úılesimdi qımyldar men minsiz saptyq daıyndyq kórermenderdiń zor yqylasyna bólenip, áskerı qyzmetshilerdiń joǵary deńgeıin kórsetti.
— Men Qyrǵyzstannan stýdent qyzymnyń qasyna keldim. Áskerı mýzykanttardyń ónerinen keremet áser aldym. Ádemi forma, minsiz tártip, tamasha repertýar. Barsha qazaqstandyqtardy Naýryz merekesimen quttyqtaımyn, — dedi Bishkekten kelgen Juldyz Ravshanova.
Іs-shara sońy elge jáne onyń qorǵaýshylaryna degen maqtanysh sezimin syılaǵan «Egemen Qazaqstan» patrıottyq kompozıtsııasymen aıaqtaldy.
Mundaı aktsııalar ásker men qoǵam arasyndaǵy baılanysty nyǵaıtyp, merekelik kóńil kúıge bóleıdi jáne otandastarǵa degen shynaıy qurmetti bildiredi.
Aıta ketelik Astanada Naýryz meıramyn aýqymdy deńgeıde toılaý bastalǵan edi.
