Qazaqstannyń Ortalyq áskerı orkestri Dohada ótetin festıvalde óner kórsetedi
ASTANA. KAZINFORM — Qazaqstan Qorǵanys mınıstrliginiń Ortalyq áskerı orkestri men Qurmet qaraýyly rotasy Katarda ótetin І Halyqaralyq áskerı mýzyka jáne marshtar festıvaline qatysady. Bul týraly vedomstvonyń baspasóz qyzmeti habarlady.
Bul mádenı shara eldiń Ulttyq kúni aıasynda uıymdastyrylyp otyr.
Festıval repertýary týraly Qarýly Kúshterdiń Ulttyq áskerı-patrıottyq ortalyǵynyń Ortalyq áskerı orkestriniń bastyǵy podpolkovnık Maqsat Shákenov aıtyp berdi.
— Festıvalde bıyl 100 jyldyǵyn atap ótken qazaqtyń uly kompozıtory Nurǵısa Tilendıevtiń áýenderinen popýrrı oryndaımyz. Sonymen birge kórermenderdi Katardyń tanymal patrıottyq ánimen qýantamyz. Bizdiń baǵdarlamamyzdy folklorlyq-etnografııalyq orkestr, bı toby jáne Qurmet qaraýyl rotasynyń defılesi tolyqtyrady, — dedi ol.
Festıvalge Ulybrıtanııa, Iordanııa, Irlandııa, AQSh, Oman, Túrkııa jáne ózge de elderdiń shyǵarmashylyq ujymdary qatysady. Sondaı-aq Katardyń elıtalyq áskerı-mýzykalyq toptary óner kórsetedi.
Buǵan deıin otandyq fılm halyqaralyq kınofestıvalde laýreat atanyn jazǵan edik.