Ortalyq Afrıka Respýblıkasyndaǵy qazaqstandyq bitimgerlerdiń kezekti rotatsııasy ótti
ASTANA. KAZINFORM – Birikken Ulttar Uıymynyń Ortalyq Afrıka Respýblıkasyndaǵy turaqtandyrý jónindegi kópsalaly keshendi mıssııasynda bir jyl qyzmet etken maıor Arman Bekbaevtyń ornyna podpolkovnık Aıbar Aqtóreev keldi. Bul týraly QR Qorǵanys mınıstrliginiń baspasóz qyzmeti málim etti.
Parlamenttiń sheshimimen bıyl úshinshi jyl Qazaqstan bul elge shtab ofıtserleri retinde áskerı qyzmetshilerin jiberip otyr. Qyzmet barysynda qazaqstandyq ofıtserler ishki ahýalǵa taldaý júrgizip, mıssııanyń ártúrli komponentteriniń is-qımyldaryn úılestiredi, qolbasshylyq úshin egjeı-tegjeıli esepter daıyndaıdy.
Osy ýaqyt aralyǵynda Ortalyq Afrıka Respýblıkasynda QR Qarýly kúshteriniń tórt áskerı qyzmetshisi bolǵanyn atap ótken jón. Qazir onda eki qazaqstandyq bitimger bar.
Olardyń jaǵdaıdy turaqtandyrýǵa qosqan úlesin mıssııa basshylyǵy joǵary baǵalady. Qoıylǵan mindetterdi kásibı jáne minsiz oryndaǵany úshin qazaqstandyq ofıtserler birneshe ret alǵys hattar men medaldar aldy.
Esterińizge sala keteıik, bitimgerlik mıssııasyn Ortalyq Afrıka Respýblıkasynda ornalastyrýǵa BUU Qaýipsizdik Keńesi 2014 jyldyń 10 sáýirinde qolaısyz gýmanıtarlyq jáne saıası jaǵdaıǵa baılanysty ruqsat bergen bolatyn.
