Ortalyq Afrıka Respýblıkasynda tarıhı saılaý ótip jatyr
ASTANA. KAZINFORM — OAR-da jalpyulttyq saılaý ótip jatyr. Onda bir mezgilde prezıdenttik, parlamenttik, óńirlik jáne mýnıtsıpaldyq saılaýlardy ótkizý uıymdastyryldy. Prezıdenttik qyzmetke basty úmitker retinde eldiń qazirgi basshysy Fosten-Arkanj Týadera aty kóbirek atalyp keledi. Bul týraly Euronews jazdy.
BUU bul saılaýdy tarıhı oqıǵaǵa balady. 1998 jyldan beri alǵash ret elde bir ýaqytta prezıdenttik, parlamenttik, óńirlik jáne mýnıtsıpaldyq saılaýlar ótip otyr.
El prezıdenti qyzmetine úshinshi ret qazirgi memleket basshysy Fosten-Arkanj Týadera úmitker bolyp otyr. 2023 jyly Týadera OAR Konstıtýtsııasyna prezıdenttik merzim sanyna shekteý qoımaıtyn túzetý engizgen.
Al Fosten-Arkanj Týaderaǵa alty úmitker qarsy túsip jatyr. Olardyń qatarynda oppozıtsııa ókilderi — burynǵy premer-mınıstrler Anıse-Jorj Dolýele men Anrı-Marı Dondra bar.
Daýys berýge qatysý úshin elde shamamen 2,4 mıllıon saılaýshy tirkelgen.
Saılaý Konstıtýtsııany qorǵaý jónindegi respýblıkalyq bloktyń qatysýynsyz ótip jatyr. Bul — eldegi basty oppozıtsııalyq koalıtsııa. Olar qazan aıynda saıası jaǵdaıdy «teń emes» dep atap, saılaýǵa boıkot jarııalaıtynyn málimdegen. Aıta keteıik, Dolýele men Dondra bul koalıtsııa quramyna kirmeıdi.
Saılaýdyń túpkilikti qorytyndysy 18 qańtarǵa qaraı jarııalanady, al aldyn ala nátıjeler bir apta ishinde belgili bolady. Eger kandıdattardyń eshqaısysy 50 paıyzdan astam daýys jınaı almasa, ekinshi týr ótkiziledi.
Ortalyq Afrıka Respýblıkasy álemdegi eń turaqsyz memleketterdiń biri sanalady. Halqy shamamen 5,5 mıllıon adamdy quraıtyn elde úkimetti qoldaıtyn kúshter men qarýly toptar arasynda qaqtyǵystar jalǵasyp jatyr. Bul qaqtyǵystar 2013 jyly negizinen musylman kóterilisshileri bılikti basyp alyp, sol kezdegi prezıdent Fransýa Bozızeni qyzmetinen ketýge májbúr etken kezde kúsheıe tústi.
2019 jyly qol qoıylǵan beıbit kelisim qaqtyǵystardy tek ishinara báseńdetti. Oǵan qol qoıǵan 14 qarýly toptyń birqatary keıin kelisimnen shyǵyp, qarýly kúresti jalǵastyrdy.
Eske sala ketsek, buǵan deıin Gvıneıada prezıdent saılaýy ótetinin jazdyq.
Al Brazılııanyń burynǵy prezıdenti Bolsonarý prezıdent saılaýynda ulynyń kandıdatýrasyn qoldady.