Ortaq platforma arqyly aýyl sharýashylyǵy men iri saýda jelileri baılanys ornatty - Ásel Janasova
«Biz áleýmettik tólemderdi jasaý ár azamat úshin yńǵaıly bolǵanyna múddelimiz. Bul jerde ınternet mańyzdy ról atqarady. Bizdiń maqsat - otandyq taýar óndirýshilerge kómekti kúsheıtý. Biz Aýyl sharýashylyǵy mınıstrligimen biryńǵaı júıede jumys isteımiz. Biz ortaq platforma arqyly aýyl sharýashylyǵymen aınalysatyndardy iri saýda jelilerimen baılanystyrdyq. Olar uzaq merzimdi kelisimshartqa otyrady. Arada deldal bolmaǵan soń ónim baǵasy da arzan bolady jáne bári ashyq túrde júzege asady», - deıdi QR Saýda jáne ıntegratsııa vıtse-mınıstri Ásel Janasova.
Onyń aıtýynsha, iri qalalarda elektrondy formatta saýda jasaý damyǵan.
«Osyndaı quraldar bar ekenin bilmeıtin shaǵyn bıznes ókilderi de bar. Tsıfrlyq marketıngpen aınalysyp, ónimin onlaın túrde jarnamalap, tutynýshy jınaý úshin de aqsha kerek. Shaǵyn bızneste qomaqty qarjy joq, sol sebepti olar mundaı jobalarǵa ınvestıtsııa quımaı, Instagram jelisine ketedi. Bul - kóleńkeli ekonomıka. Bul - kásibı qadam emes. Bizdiń mindet - sondaı kásipkerlerge ónimin elektrondy túrde jarnamalaýdy, tólem jasaýdy, jetkizý joldaryn úıretý», - deıdi Ásel Janasova.
