Ortaǵasyrlyq Jankent qalashyǵynda arheologııalyq qazba jumysy bastaldy
QYZYLORDA. KAZINFORM — Qyzylorda oblysynyń Qazaly aýdanyndaǵy respýblıkalyq mańyzy bar ortaǵasyrlyq Jankent qalashyǵynda oblys ákimdiginiń qoldaýymen arheologııalyq qazba jumysy qolǵa alyndy.
Oblystyq tarıhı-mádenı murany qorǵaý ortalyǵynyń málimetinshe, qum astyndaǵy qupııany ashýǵa Qorqyt ata atyndaǵy Qyzylorda ýnıversıtetiniń Arheologııa jáne etnografııa ǵylymı ortalyǵynyń qyzmetkerleri, arheolog ǵalymdar, stýdentter jáne ortalyq mamany tartylǵan.
— Jankent qalashyǵyn arheologııalyq zertteý 2014 jyldan beri oblystyq bıýdjet esebinen júrgizilip keledi. Tabylǵan qorǵanys qabyrǵalary men munaralary, turǵyn úılerdiń oryndary, mańyzdy qurylys nysandary, qysh kúıdiretin peshter arshylyp, konservatsııalandy. Turǵyn úıdiń bir bólmesiniń kompozıtsııasy jasaqtalyp, Oǵyz dáýiriniń turmys-salt dástúrinen habar beretin tarıhı músinder qoıylyp, týrıster úshin qalashyq ishindegi turǵyn úıdiń ejelgi qalpyn kórýge múmkindik jasaldy. Sondaı-aq ınfraqurylymdy jaqsartý baǵytynda qalashyqqa deıin jol tóselip, belgilengen qorǵaý aımaǵy boıynsha qalashyqtyń aýmaǵy tolyq qorshaldy. 2019-2020 jyldar aralyǵynda jáne 2025 jyly Mádenıet jáne sport mınıstrligi tarapynan qalashyqtyń shyǵys qorǵanys qabyrǵasy, tsıtadeldiń qaqpasy qalpyna keltirildi. Bul jolǵy qazba jumysy josparǵa sáıkes qalashyqtyń shyǵys qaqpasy men shahrıstan bóligin qamtıdy, — dedi ortalyq basshysy Erqazy Aldanazarov.
Tarıhshylar Jankenttiń Oǵyz memleketiniń saıası ortalyǵy bolý sebebin onyń geografııalyq qolaıly aımaqta, kóshpendiler men otyryqshy-eginshilerdiń shekarasynda ornalasýymen, oǵyz dalalaryn Horezm, Máýerennahr, Horasan aımaqtarymen jalǵastyrǵan dáliz qyzmetin atqarýymen baılanystyrady.
— Ejelgi shahar «Jibek joly: Ferǵana-Syrdarııa dálizi» nomınatsııasy boıynsha ıÝNESKO-nyń Dúnıejúzilik Mádenı muralar tizimine jáne «Jalpyulttyq qasıetti nysandar» tizimine engizilgen. Qorǵaý aımaǵy belgilengen. 2019 jyly qalashyqtyń aýmaǵy tolyq qorshalyp, stela ornatyldy. Qyzylorda oblysynyń tarıhı-mádenı mura obektileriniń 3 D formattaǵy ınteraktıvti kartasyna qalashyq týraly aqparat engizildi. Sondaı-aq QR-kod taqtaıshasy ornatyldy, — dedi ortalyq basshysy.
Buǵan deıin biz Uly Jibek jolynyń boıynda, Horezmnen Sarysý, Torǵaı boıy arqyly Batys Sibir men Ortalyq Qazaqstanǵa ótetin kerýen joldarynyń túıisken jerinde ornalasqan Jent qalashyǵy týraly jazǵanbyz.
