Ortaǵa beıimdeletin jaǵdaıda boldy — Vıtse-mınıstr balany pyshaqtaǵan jasóspirim týraly

ASTANA. KAZINFORM — Elordada 5 jasar balany lıftide pyshaqtaǵan jasóspirim qazir dárigerlerdiń baqylaýynda. Onyń jaǵdaıyna qatysty tolyǵyraq Densaýlyq saqtaý mınıstriniń orynbasary Erjan Nurlybaev aıtyp berdi.

— Jasóspirim statsıonarda bolǵanda taǵaıyndalǵan em tıimdiligin kórsetti, eshqandaı kúdik týdyrǵan joq, biz baqylaýda ustadyq. Teris áseri baıqalmady, jasóspirimdi bólek ustaýdyń qajettiligi bolmady. Ortaǵa beıimdeletin jaǵdaıda boldy. Jasóspirimdi statsıonardan shyǵarǵannan keıingi jaǵdaıyna qatysty qazir komıssııa jumys istep jatyr, — dedi Erjan Nurlybaev Májilis qabyrǵasynda BAQ ókilderiniń saýalyna jaýap bere turyp.

Vıtse-mınıstrdiń aıtýynsha, tyńǵylyqty zertteýden keıin jasóspirimniń jaǵdaıyna qatysty aqparat usynylady. 

Sondaı-aq, jasóspirimdi statsıonardan byltyr jyl sońynda nemese bıyl jyl basynda shyǵarǵan. 

— Jasóspirimniń ata-anasyn aıyptamaımyn, biraq statsıonardan shyǵarǵannan keıin dári-dármekti ýaqtyly qabyldaý, basqa da rejımge ata-ana nemese qamqorshy jaýapty. Patsıent statsıonardan shyqqan kezde biz jáne qamqorshy teńdeı jaýaptymyz. Qazir jasóspirim dárigerlerdiń baqylaýynda, onyń jaǵdaıynda qaýip joq, — deıdi ol.

Aıta ketsek, lıftide balany pyshaqtaǵan jasóspirimdi jalǵyzbasty ana tárbıelep otyrǵany belgili boldy. 

Eske sala ketsek, elordada jasóspirim lıfti ishinde balany pyshaqtap tastaǵan edi. Keıin belgili bolǵandaı pyshaqpen shabýyldaǵan jasóspirim arnaıy esepte turǵan.

Dárigerler zardap shekken balaǵa dereý ota jasap, psıhologııalyq kómek kórsetti.

Qazir balany pyshaqtaǵan jasóspirim psıhıatrııalyq statsıonarda.