Orta jáne shaǵyn bankterdiń ýaqyty týdy - Borıs Ýmanov
ALMATY. 14 sáýir. QazAqparat /Erlik Erjanuly/ - «Eýrazııa» saqtandyrý kompanııasy» AQ-nyń Basqarma tóraǵasy Borıs Ýmanovtyń aıtýynsha, kóptegen alpaýyt «bank-qubyjyqtar» ózderiniń kúrt ózgergen jaǵdaılarda tıimsizdigin kórsetip,
aýqymdy memlekettik járdemniń arqasynda ǵana óz jumysyn jalǵastyra aldy. Bul álemdik daǵdarys qorytyndysynan shyǵatyn tujyrymdardyń biri. Ol týraly búgin Almatyda ótip jatqan 7-shi Halyqaralyq táýekel-menedjmenti konferentsııada aıtyldy.
«Ǵalamsharda júıtkip ótken qarjylyq quıyn osy naryqtyń qatysýshylarynyń myqtylyǵy úshin ózinshe bir stress-test jáne tekserý boldy. Búginderi táýekelderdi basqarý turǵysynan anaǵurlym ornyqty ári damý strategııasyna túzetý engizý qajettiligi týyndaǵan kezde anaǵurlym ıkemdirek orta jáne shaǵyn bankterdiń ýaqyty týdy. Úlken emes bankter strestik aktıvter qoryna muqtaj emes, sebebi olarda ol joq. Sonymen qatar orasan zor syrtqy qaryzdy tóleý qıyndyǵy da joq, óıtkeni olar kórpesine qaraı kósiledi», - deıdi Borıs Ýmanov.
Onyń paıymdaýynsha, táýekel-menedjment turǵysynan shaǵyn ári orta bankterdiń megabankterdiń «ornyna» kelýi nur ústine nur bolar edi. Júıede «too big to fail» sanatyndaǵy oıynshylardyń bolmaýy memleketke daǵdarys jaǵdaılarynda mıllıardtaǵan dollarlardy jumsamaý múmkindigin berer edi. Kishkentaı teksheli bankterdi, bank-býtıkterdi, sondaı-aq tek jelide jumys isteıtin onlaın-bankterdi qyzmet etý quqyǵynan aıyrýǵa bolmaıdy. 21 ǵasyrda klıentke kelý úshin fızıkalyq fılıal jelisin damytý mindetti emes.
