Orta mekteptiń 9-synyp oqýshysyna kisi óltirdi degen aıyp taǵyldy - QR ІІM
ASTANA. 11 mamyr. QazAqparat /Jasulan Amanbaıuly/ - Orta mekteptiń 9-synyp oqýshysy Kókshetaý qalasynda kisi óltirdi degen kúdik keltirilýde.
Bul týraly búgin elordada eldegi krımınogendik ahýal jaıynda baıandaǵan QR ІІM-niń Ákimshilik polıtsııa komıtetiniń tóraǵasy Qaırat Tynybekov málim etti.
Onyń aıtýynsha, Kókshetaý qalasynda 8 mamyr kúni keshke kóshede kásibı lıtseıdiń ekinshi kýrs stýdentiniń pyshaq jaraqaty bar máıiti tabylǵan.
Keıin jedel-izdestirý sharalary barysynda kúdik orta mekteptiń 9- synyp oqýshysyna túsken.
«Janjaldasý barysynda kisi óltirgeni úshin krımınaldyq polıtsııa qyzmetkerleri osy qalanyń turǵyny, orta mekteptiń 9-synyp oqýshysyn ustap, ýaqytsha ustaý ızolıatoryna qamady»,-dedi Q. Tynybekov.
Jalpy mamyr aıynyń alǵashqy on kúninde elimizdiń aýmaǵynda 47 kisi óltirý qylmysy jasalǵan. Onyń 42-si izi sýymaı ashyldy.
