Orta deńgeıli kásip ıeleri memlekettik qurylymdar úshin salyq tólemderin toltyrý kózi ǵana bolyp otyr - Eńbek jáne halyqty áleýmettik qorǵaý vıtse - mınıstri
ASTANA. Qańtardyń 19-y. QazAqparat /Aıdar Ospanalıev/ - Resmı málimetter men áleýmettik zertteýlerdiń nátıjeleri boıynsha, eldegi ózin-ózi jumyspen qamtyǵan azamattardyń basym bóligin áıel azamattar qurap otyr.
ıAǵnı óziniń jeke kásibin uıymdastyrýǵa erlerge qaraǵanda, kóbine áıelder bel býa kirisedi. Bul másele jóninde búgin Astanada «Almaty qalasy men Almaty oblysynyń Eńbekshiqazaq aýdanynyń úlgisindegi halyqtyń ózin-ózi jumyspen qamtý jaǵdaıy týraly» atty taqyrypta ótken dóńgelek ústel otyrysynda Birjan Nurymbetov málim etti, dep habarlaıdy QazAqparat.
Onyń málimetteri boıynsha, ózin-ózi jumyspen qamtyǵan áıelder negizinen usaq-túıek saýda men túrli kásiptermen aınalysady. «Búginde eldegi ózin-ózi jumyspen qamtýǵa qatysty máselelerdiń arasynda eń mańyzdy da ózektisi osy sanattaǵy azamattardyń zańdyq mártebeleri men olardyń ekonomıkany damytýdaǵy róline qatysty bolyp otyr. Qazirgi tańda ózin-ózi jumyspen qamtý tek jumyssyzdyqpen kúres sharasy ǵana emes, turǵyndardyń áleýmettik-ekonomıkalyq problemalaryn sheshý quraly bolyp otyr. Osyǵan qaraı ózin-ózi jumyspen qamtý, jaldamaly eńbekten kásipkerlikke ulasatyn úderis retinde qoǵamnyń orta tobyn qalyptastyrýǵa negiz bolatyn sharttardyń biri. Álemdik tájirıbe boıynsha, úkimet te, iri kásiporyndar da memleketti qajetti jumys oryndarymen tolyq qamtamasyz ete almaıdy. Sondyqtan turǵyndardyń ózin-ózi jumyspen qamtý máselesinde usaq, orta deńgeıli bıznesti damytýdyń mańyzy óte zor», dedi vıtse-mınıstr.
Onyń pikirinshe, orta deńgeıli kásip ıelerin áleýmettik turǵydan alǵanda «kózge kórinbeıtin azamattar» dep ataýǵa bolady. Memlekettik qurylymdar úshin olar salyq tólemderin toltyrý kózi. «Árıne, mundaı jaǵdaıda olardyń eńbek quqyqtarynyń saqtalýy jóninde áńgime qozǵaý múmkin emes. Soǵan qaramastan, qoǵamnyń tap osy tobyndaǵy azamattar tutynýshylarmen tyǵyz baılanysty jumys isteıtin jáne turǵyndardyń ómir súrý deńgeıi men naryqtyń jaǵdaıyn naqty kórsetýshiler bolyp tabylady. Sondyqtan olardy búgin zańdy naryqtyq alańǵa alyp shyǵý, memlekettiń basty maqsattarynyń biri dep bilemin», dedi B.Nurymbetov.
