Orta dálizdiń damýy Qazaqstan men EO úshin jańa múmkindikter ashady — belgııalyq sarapshy
ASTANA. KAZINFORM — Belgııalyq sarapshy jáne Diplomatic World basylymynyń jobalaýshy dırektory Alberto Tıýrkstra Qazaqstan Prezıdenti Qasym-Jomart Toqaevtyń jyl saıynǵy «Jańa tarıhı kezeńdegi Qazaqstannyń ózekti mindetteri» atty Joldaýy týraly Kazinform agenttiginiń Brıýsseldegi menshikti tilshisimen oı bólisti.
Onyń aıtýynsha, Qasym-Jomart Toqaevtyń sózi ádettegideı eldiń ishinde de, sonymen qatar halyqaralyq deńgeıde de — syrtqy saıasat jáne Qazaqstannyń seriktesterimen, eń aldymen Eýropa Odaǵymen qarym-qatynasyn damytý turǵysynan úlken qyzyǵýshylyq týdyrady.
Tıýrkstra Joldaýda ekonomıkaǵa kóbirek oryn berilgenin atap ótti.
Saıası jáne ınstıtýtsıonaldyq reformalardyń nátıjeleri, atap aıtqanda Qazaqstan halqynyń jańa Konstıtýtsııany qabyldaýy jáne jańa Parlamenttik qurylymdy qalyptastyrǵany aıtyldy. Belgııalyq saıasattanýshynyń pikirinshe, memlekettik ınstıtýttar úshin qazirgi negizgi mindet — ekonomıkalyq sharalardyń aýqymdy paketin júzege asyrý.
Sarapshy basymdyq beriletin baǵyttar qatarynda tsıfrlandyrý men jasandy ıntellektti engizýdi atady.
— Men jaqynda Astanada ótken «Digital Bridge» (AI and Digital Summit) forýmyna qatystym. Onda Qazaqstanda tsıfrlyq tehnologııalardyń joǵary deńgeıde damyǵanyna jáne eldiń kóptegen jahandyq úrdisterden oza alatyn áleýetine kóz jetkizdim. Tsıfrlandyrý densaýlyq saqtaý, bilim berý, sý resýrstaryn basqarý jáne turaqty damý maqsattaryna qol jetkizý sııaqty qoǵamnyń mańyzdy salalaryn jaqsartý quraly, — dedi ol.
Tıýrkstra Qazaqstannyń kólik ınfraqurylymyn damytý josparlaryna: porttar, áýejaılar, joldar jáne logıstıkalyq ortalyqtar salý jobalaryna erekshe nazar aýdardy.
— Bul, árıne, Transkaspıı halyqaralyq kólik baǵytyn, ıaǵnı Orta dálizdi keńeıtýmen tikeleı baılanysty. Bul baǵyt Eýropa Odaǵynyń bastamalarymen, atap aıtqanda, Global Gateway strategııasymen tolyq úılesedi. Orta dálizdiń áleýetin tolyq júzege asyrý jáne kedergilerdi joıý úshin eki taraptyń belsendi birlesken kúsh-jigeri qajet, — dedi Tıýrkstra.
Belgııalyq saıasattanýshy sonymen qatar el ishinde shıkizatty tereń óńdeýdiń, qosylǵan quny bar ónimder shyǵarýdyń jáne Qazaqstan úshin de, Eýropa Odaǵynyń kóptegen elderi úshin de ózekti bolyp tabylatyn «jasyl» energetıkaǵa kóshýde mańyzdy ról atqaratyn ıadrolyq energetıkany damytýdyń mańyzdylyǵyn atap ótti.
Buǵan deıin túrik sarapshysy Toqaevtyń Joldaýy Qazaqstan úshin damýdyń jańa mejelerin belgileıtinin aıtqan edi.
