Orta dálizdi damytý: TMU elderi kedendik tsıfrlandyrý boıynsha ortaq qadamdarǵa kelisti
TÚRKІSTAN. KAZINFORM — 6-8 qyrkúıek aralyǵynda Túrkistan qalasynda Ázirbaıjan, Qazaqstan, Qyrǵyzstan, Túrkııa jáne Ózbekstan keden ákimshilikteri basshylarynyń 11-shi otyrysy ótti. Otyrysqa Vengrııa, Grýzııa jáne Túrkimenstannan baqylaýshylar da qatysty. Bul týraly Memlekettik kirister komıteti málim etti.
Qazaqstan Respýblıkasy Qarjy mınıstrliginiń Memlekettik kirister komıtetiniń tóraǵasy Jandos Dúısembıev óz sózinde otyrystyń dál Túrkistanda ótýi tek praktıkalyq qana emes, sonymen qatar tereń sımvolıkalyq mańyzǵa ıe ekenin atap ótti. Túrkistan túrki áleminiń rýhanı ortalyǵy retinde baýyrlas halyqtardyń birligi men ózara túsinistigin beıneleıdi, al búgingi kezdesý yntymaqtastyqty nyǵaıtýǵa degen umtylystyń dáleli bolyp tabylady.
— Tóraǵa sońǵy jyldary TMU elderi arasyndaǵy saýda-ekonomıkalyq yntymaqtastyqtyń turaqty ósim kórsetip otyrǵanyn atap ótti, bul tsıfrlyq sheshimderdi engizý, rásimderdi jeńildetý jáne ózara senimdi nyǵaıtýdyń nátıjesi bolyp tabylady. Ol Vengrııadaǵy TMU beıresmı sammıtinde Qazaqstan Respýblıkasynyń Prezıdenti Qasym-Jomart Toqaev belgilegen strategııalyq mindetke — Orta dálizdi Shyǵys pen Batys arasyndaǵy senimdi jáne zamanaýı kópirge aınaldyrýǵa erekshe nazar aýdardy, — delingen habarlamada.
Osyǵan baılanysty MKK tóraǵasy praktıkalyq qadamdardyń qajettiligin atap ótti:
- aqparat almasýdyń tehnıkalyq sharttaryn iske asyrý, ýákiletti ekonomıkalyq operatorlar (ÝEO) ınstıtýtyn damytý;
- «Biryńǵaı tereze» júıesin jáne kedendik ákimshilendirýdi tsıfrlandyrýdyń zamanaýı quraldaryn engizý.
Bul sharalar taýar aınalymyn jedeldetýge, qaýipsizdikti arttyrýǵa jáne jetkizý tizbeginiń turaqtylyǵyn qamtamasyz etýge múmkindik beredi.
Otyrysqa qatysýshylar úzdik ulttyq tájirıbelerdi talqylady, onda Qazaqstan «Keden» ulttyq ıntegratsııalanǵan platformasynyń múmkindikterin usyndy, al Túrkııa «Jibek joly» bastamasy aıasynda «Kerýen-saraı» jobasyn tanystyrdy.
Kezdesý qorytyndysy boıynsha:
- 11-shi otyrystyń hattamasyna;
- HJT Konventsııasyna (1975 j.) 11-qosymshany qoldaný týraly birlesken málimdemege;
- táýekelderdi basqarý jáne kedendik zerthanalardy damytý salasyndaǵy yntymaqtastyq týraly memorandýmdarǵa qol qoıyldy.
Otyrysty aıaqtaı otyryp, qatysýshylar ózara is-qımyldy odan ári tereńdetýge jáne baýyrlastyq baılanystardy nyǵaıtýǵa beıildiligin rastap, birlesken kúsh-jiger túrki áleminiń zamanaýı, ashyq jáne ınnovatsııalyq keden júıesin qalyptastyrýǵa yqpal etetinin atap ótti.
Eske sala keteıik, buǵan deıin Memlekettik kirister komıteti júk kólikteriniń Qazaqstan shekarasynan ótý tártibine qatysty túsinikteme bergen edi.