Orta dáliz arqyly júk tasymalynyń kólemi artady
ASTANA. KAZINFORM – 2 maýsym kúni Grýzııanyń Ahalkalakı qalasyndaǵy temirjol-logıstıkalyq keshende Baký–Tbılısı–Kars (BTK) temirjol jelisiniń jańǵyrtylǵan bóligin paıdalanýǵa berý rásimi ótti, dep habarlaıdy Kazinform agenttiginiń menshikti tilshisi.
Ashylý saltanatyna Grýzııa Premer-mınıstri Iraklıı Kobahıdze, Ázerbaıjannyń tsıfrlyq damý jáne kólik mınıstri Rashad Nabıev, Grýzııanyń ekonomıka jáne ornyqty damý mınıstri Marıam Kvrıvıshvılı jáne Túrkııanyń kólik jáne ınfraqurylym mınıstri Abdýlkadır Ýraloglý qatysty.
Іs-sharaǵa sondaı-aq Qazaqstan men Ózbekstan ókilderi, dıplomatııalyq korpýs músheleri jáne óńirdiń halyqaralyq seriktesteri qatysty.
Grýzııanyń Ekonomıka jáne ornyqty damý mınıstrliginiń málimetinshe, Baký–Tbılısı–Kars temirjol jelisi – Eýropa men Azııa arasyndaǵy kólik baılanysyn nyǵaıtýǵa baǵyttalǵan Ázerbaıjan, Grýzııa jáne Túrkııanyń birlesken strategııalyq jobasy.
Jańǵyrtý jumystary aıasynda uzyndyǵy 180 shaqyrym bolatyn Marabda–Kartsahı ýchaskesi tolyq jańartyldy. Onyń 153 shaqyrymy qaıta jóndelip, taǵy 27 shaqyrym jańa temirjol jelisi eýropalyq standarttarǵa saı salyndy.
Joba tolyq qýatyna shyqqannan keıin temirjoldyń ótkizý qabileti jylyna 5 mıllıon tonna júkke jetedi dep kútilýde. Bul Orta dáliz arqyly ótetin tranzıt kólemin edáýir arttyryp, óńirdiń Eýrazııadaǵy negizgi logıstıkalyq baǵyttardyń biri retindegi pozıtsııasyn kúsheıtedi.
BTK baǵytynyń mańyzy jahandyq saýda tizbekteriniń qaıta qurylýy, Qytaı men Eýropa arasyndaǵy tranzıt kóleminiń artýy jáne Transkaspıı halyqaralyq kólik baǵyty róliniń kúsheıýi aıasynda aıtarlyqtaı ósti.
Sarapshylardyń pikirinshe, jańǵyrtylǵan ýchaskeniń iske qosylýy konteınerlik tasymaldardy jedeldetýge, balama baǵyttarǵa túsetin júktemeni azaıtýǵa jáne Ortalyq Azııa men Ońtústik Kavkaz elderiniń eksporttyq ári tranzıttik múmkindikterin keńeıtýge jol ashady.
Jańartylǵan magıstral tranzıt ýaqytyn qysqartady. Qazirgi ýaqytta Qytaıdyń Sıan qalasynan Eýropalyq odaq shekarasyna deıin júk jetkizý 13–14 kúndi alady. Bul baǵyt teńiz tasymalyna qaraǵanda áldeqaıda jyldam ári áýe tasymalyna qaraǵanda ekonomıkalyq turǵydan tıimdi.
Jobanyń aıaqtalýy 18 mamyrda grýzııalyq delegatsııanyń Bakýge sapary kezinde Ázerbaıjan men Grýzııa arasyndaǵy ekijaqty úılestirý keńesiniń hattamasyna qol qoıylǵannan keıin múmkin boldy.
Buǵan deıin Ázerbaıjan men Grýzııa alty jyldyq úzilisten keıin temirjol qatynasyn qaıta jandandyratyny habarlanǵan edi.
Sondaı-aq jyl basynda taraptar Grýzııanyń Potı qalasy men Baký arasynda konteınerlik poıyz qatynasyn iske qosty.
