Orta dáliz arqyly júk tasymaly 22%-ǵa artty
ASTANA. KAZINFORM — Kólik vıtse-mınıstri Jánibek Taıjanov 7–8 qyrkúıek kúnderi Batýmı qalasynda ótken Grýzııa halyqaralyq teńiz forýmyna qatysty.
Mınıstrliktiń baspasóz qyzmeti málim etkendeı, forým barysynda halyqaralyq kólik dálizderin damytý, Eýropa men Azııa arasyndaǵy kólik-logıstıkalyq baılanystardy nyǵaıtý, sondaı-aq kólik salasyn tsıfrlandyrý máseleleri talqylandy.
Forýmnyń alǵashqy kúninde Jánibek Taıjanov «Teńizderden dálizderge: álemdik saýdanyń jańa geografııasy» atty paneldik sessııada sóz sóıledi. Talqylaý barysynda Orta dálizdi damytýǵa, teńiz, temirjol jáne port kóligin ózara yqpaldastyrýǵa, sondaı-aq halyqaralyq jetkizý tizbekteriniń mobıldiligi men tıimdiligin arttyrýǵa erekshe nazar aýdaryldy.
Vıtse-mınıstr Transkaspıı halyqaralyq kólik marshrýtynyń (THKM) damýyndaǵy oń dınamıkany atap ótti.
— Bıylǵy 8 aıdyń qorytyndysy boıynsha THKM arqyly tasymal kólemi 22%-ǵa artty. Al Shyǵys–Batys baǵyty boıynsha tranzıttik tasymal 55%-ǵa ósti, — dedi ol.
Sóz barysynda kólik dálizderin tsıfrlandyrý máselesine erekshe kóńil bólindi. Forým qatysýshylaryna Memleket basshysy Qasym-Jomart Toqaevtyń kólik marshrýttarynyń tsıfrlyq kartasyn qurý qajettigi týraly ustanymy tanystyryldy. Ony engizý halyqaralyq kólik dálizderi boıynsha kólik ınfraqurylymyn, logıstıkalyq tizbekterdi jáne júk aǵyndarynyń negizgi qozǵalys parametrlerin keshendi túrde kórsetýge múmkindik beredi.
Forým jumysyna memlekettik organdar men teńiz ákimshilikteriniń basshylary, halyqaralyq uıymdardyń, port salasynyń, kólik-logıstıka bıznesiniń ókilderi jáne sarapshylar qatysty.
Іs-shara aıasynda port ınfraqurylymyn damytý, teńiz kóligi salasyndaǵy halyqaralyq yntymaqtastyq, salany tsıfrlyq transformatsııalaý, navıgatsııa men keme qatynasy qaýipsizdigin jetildirý, sondaı-aq teńiz sektorynda «bir tereze» qaǵıdatyn qoldaný máseleleri de talqylandy.
Sonymen qatar Jánibek Taıjanov forým aıasynda beıindi mınıstrlikter men vedomstvolardyń, sondaı-aq bıznes ókilderimen ekijaqty kezdesýler ótkizdi. Kezdesýler barysynda kólik-logıstıka salasyndaǵy yntymaqtastyqty odan ári damytý, Orta dáliz arqyly júk aǵynyn arttyrý jáne kólik protsesterin tsıfrlandyrý máseleleri talqylandy.
Buǵan deıin habarlanǵandaı, qazaqstandyq teńiz porttarynyń jıyntyq qýaty búginde 21,8 mln tonnany quraıdy, al 2030 jylǵa qaraı ony 30 mln tonnaǵa deıin arttyrý josparlanyp otyr.
