Orta dáliz arqyly tranzıttik tasymal 90 paıyzǵa ósti — Toqaev
ASTANA. KAZINFORM — Bul týraly Qasym-Jomart Toqaev Túrki memleketteri uıymynyń 13-sammıtinde aıtty.
Prezıdent kólik-logıstıka salasyndaǵy áriptestikti tereńdetý basym mindettiń biri dep sanaıdy.
– Túrki álemin ózara baılanystyrý isinde Transkaspıı halyqaralyq kólik baǵytynyń alatyn orny erekshe. Bıylǵy 9 aıda Orta dáliz arqyly tasymaldanǵan júktiń kólemi 30 paıyzǵa artty.
Sonyń ishinde tranzıttik tasymal kólemi 90 paıyzǵa ósti. Al Qazaqstannyń Túrki memleketteri uıymyna múshe eldermen temirjol arqyly júk tasymaly 10 paıyzǵa ulǵaıyp, 40 mıllıon tonnaǵa jaqyndady. Avtokólikpen tasymaldanǵan júk kólemi de 20 paıyzǵa kóbeıip, 6,5 mıllıon tonnaǵa jetti.
Osy oraıda, biz Qazaqstannyń tranzıttik áleýetin arttyra túsý úshin elimizde basymdyq retinde arnaıy baǵdarlamany júzege asyratyn boldyq. Jalpy, elimiz úshin Orta dáliz boıyndaǵy logıstıka ınfraqurylymyn jáne teńiz porttaryn jańǵyrtý jumysynyń mańyzdylyǵy ózgermeıdi.
Alaıda basqa kólik-logıstıka baǵdarlary, ıaǵnı, Soltústik-Ońtústik dálizi, «Bir beldeý, bir jol» jobasy jáne ózge de joldar Qazaqstan úshin óte paıdaly ári tıimdi bolyp qala beredi, – dedi Qasym-Jomart Toqaev.
Aıta ketelik Memleket basshysy Túrki jurty tonnyń ishki baýyndaı tatý bolyp, alǵa nyq qadam jasap jatqanyn aıtqan edi.
