Orta bilim berý júıesindegi jasandy ıntellekti: mınıstrlik keshendi jospar ázirledi
ASTANA. KAZINFORM – Búgin Úkimet otyrysynda QR Oqý-aǵartý mınıstrligi orta tilim salasyna jasandy ıntellektini endirý protsesine qatysty túsinik berdi.
- 12 mamyrda Memleket basshysy bilim berý júıesine jasandy ıntellektini engizý týraly Jarlyqqa qol qoıdy. Bul baǵyttaǵy jumystar qalaı iske asyrylyp jatyr?, - dep surady Premer-mınıstr Oljas Bektenov.
Óz kezeginde QR Oqý-aǵartý mınıstri Juldyz Súleımenova atalǵan Jarlyqty júzege asyrý boıynsha vedomstvo júıeli jumysty bastaǵanyn aıtty.
- Birinshiden, keshendi jospar jobasy ázirlendi. Atalǵan jospar belgilengen tártippen Úkimet qaraýyna engiziledi. Bul qujatta jalpy barlyq mekteptiń ınternet jáne ınfraqurylymdyq damýyn jetildirý, pedagogterdiń kásibı biliktiligin damytý, sondaı-aq jasandy ıntellekt tehnologııalaryn oqý protsesine engizýge qatysty úlken ádistemelik ári tanymdyq baǵyttar zerdelenip jatyr. Búginde pılottyq jobaǵa 500 mektepti irikteý máselesi qarastyrylyp otyr. Onyń ishinde 250 shaǵyn jınaqty mektep, 100 «Keleshek» mektebi, 150 jalpy bilim beretin aýyl jáne qala mektebin qamtý jóninde usynysymyz bar, - dedi mınıstr.
Osy oraıda ol aýyl jáne qala mektepteri arasyndaǵy bilim sapasy alshaqtyǵy máselesin jasandy ıntellekti tehnologııasyn engizý arqyly sheshý eskerilgenin atap ótti.
J. Súleımenovanyń aıtýynsha, Jarlyq aıasynda pedagogterdi oqytýǵa erekshe ekpin qoıylǵan.
- Sonymen qatar, oqýshylardyń derbes málimetterin qorǵaýǵa nazar aýdaryp otyrmyz. Buǵan qatysty buıryqtarymyz zań jobasyna sáıkes qatańdatylyp jatyr. Bul rette jaýakershilik máselesi, málimetterdi qorǵaý keńinen qarastyrylý ústinde, - dedi vedomstvo basshysy.
Eske salsaq, jaqynda Memleket basshysy «Qazaqstan Respýblıkasynyń orta bilim berý júıesine jasandy ıntellektini endirý jónindegi sharalar týraly» Jarlyqqa qol qoıdy.
