Orta bilim berý júıesinde kadr tapshylyǵy tolyq joıyldy

ASTANA. KAZINFORM – Bıylǵy oqý jylynda 36 pedagog memlekettik nagradalarmen marapattaldy. Bul týraly Ortalyq kommýnıkatsııalar qyzmetindegi brıfıngte Oqý-aǵartý mınıstrliginiń resmı ókili Mereke Nurmuhanova aıtty.

- Qazirgi ýaqytta elimizdiń orta bilim berý uıymdarynda 412 myńnan astam pedagog eńbek etýde. Bul byltyrǵy jylmen salystyrǵanda 14 myńǵa artyq. Olardyń 73 paıyzǵa jýyǵy – joǵary biliktilik sanatyna ıe. Osy jerde erekshe toqtalyp ótsem deımin, pedagogter sanynyń artýy - elimizdiń orta bilim berý júıesinde kadr tapshylyǵynyń tolyǵymen joıylýyna yqpal etti, - dedi resmı ókil.

Ol Memleket basshysynyń tarapynan ustazdardyń qoǵamdaǵy mártebesin kóterýge erekshe kóńil bólinip kele jatqanyn aıtty. 

- Buǵan aıqyn dálel - Qazaqstan tarıhynda alǵash ret bıylǵy oqý jylynda eki pedagogke prezıdent Qasym Jomart Toqaev «Qazaqstannyń Eńbek Eri» ataǵyn tapsyrdy. Sondaı-aq, 36 pedagog memlekettik nagradalarmen marapattaldy, 64 muǵalim «Úzdik pedagog» ataǵyn ıelendi jáne olarǵa memleket tarapynan 1 000 aılyq eseptik kórsetkish kóleminde syıaqy taǵaıyndaldy, - dedi Mereke Nurmuhanova.

Buǵan deıin halyqaralyq olımpıadaǵa qatysqan árbir ekinshi oqýshy júldeger bolǵanyn jazǵan edik.