2026–2027 oqý jyly: mektep formasyna qatysty negizgi talaptar qandaı
ASTANA. KAZINFORM – Ata-analar mektep formasyn kez kelgen saýda jelisinen satyp alyp, óndirýshini erkin tańdaı alady.
Qazaqstan Respýblıkasynyń Jańa Konstıtýtsııasyna sáıkes din memleketten bólek, al bilim berý uıymdaryndaǵy bilim men tárbıe berý júıesi zaıyrly sıpatqa ıe.
Mindetti mektep formasyna qoıylatyn talaptar ony qoldanýda birizdilikti qamtamasyz etýge, ata-analardyń oń kózqarasyn qalyptastyrýǵa jáne bilim berý uıymdarynyń jaýapkershiligin arttyrýǵa baǵyttalǵan.
— Uldar men qyzdarǵa arnalǵan mektep formasy kúndelikti, merekelik jáne sporttyq bolyp bólinedi. Ony tańdaýda bilim alýshylardyń jas erekshelikteri, klımattyq jaǵdaılar, sabaq ótetin oryn, oqý ǵımaratyndaǵy temperatýralyq rejım jáne qaýipsizdik talaptary eskeriledi.
Mektep formasynyń pishimin bilim berý uıymy qamqorshylyq keńestiń, ata-analar komıtetiniń jáne mekteptegi ózin-ózi basqarý organdarynyń qatysýymen aıqyndaıdy. Ol jalpy mekteptik ata-analar jınalysynyń hattamasymen bekitiledi. Mektep formasyna engiziletin ózgerister de atalǵan keńestermen kelisý arqyly qabyldanady.
Ata-analar mektep formasyn kez kelgen saýda jelisinen satyp alyp, óndirýshini erkin tańdaı alady. Bilim berý uıymdary tarapynan jekelegen óndirýshilerge artyqshylyq berýge jol berilmeıdi, — delingen mınıstrlik habarlamasynda.
Áleýmettik osal sanattaǵy otbasylardyń balalaryna Jalpyǵa birdeı bilim berý qory aıasynda mektep formasyn, aıaq kıim men mektepke qajetti quraldardy satyp alýǵa memlekettik qoldaý kórsetiledi. 2026-2027 oqý jyly qarsańynda mundaı qoldaýmen 450 myńǵa jýyq balany qamtý josparlanyp otyr. Osy maqsatqa jergilikti bıýdjetterden shamamen 23 mlrd teńge qarastyrylǵan.
Qaýipsizdik talaptaryna sáıkes mektep formasynda jaraqat keltirýi múmkin fýrnıtýra men aksessýarlar bolmaýy tıis. Sondaı-aq bilim berý uıymdarynyń jarǵylarynda belgilengen qaǵıdalarǵa sáıkes oqý ǵımaraty ishinde bas kıimmen júrýge jol berilmeıdi.
— «Bilim týraly» Qazaqstan Respýblıkasynyń Zańyna sáıkes ata-analar bilim berý uıymynyń jarǵysynda belgilengen qaǵıdalardy jáne mindetti mektep formasyna qoıylatyn talaptardy saqtaýǵa mindetti, — delingen mınıstrlik habarlamasynda.
Aıta ketelik mektepterdegi kanıkýl men emtıhan kestesi bekitilgen edi.
