Órt janarmaı beketterindegi saýdaǵa kedergi keltirmeıdi - Pavlodar MÓZ
PAVLODAR. QazAqparat - «Pavlodar munaı-hımııa zaýyty» JShS-ndaǵy órtten keıin qubyr jelisindegi jaramsyz bolyp qalǵan tustaryn almastyrý boıynsha dánekerleý jumystary aıaqtaldy, dep habarlaıdy «QazAqparat».
«Oqıǵa respýblıkadaǵy janarmaı quıý beketterindegi satylymǵa kedergi keltirmeıdi, - dep málim etti «Pavlodar munaı-hımııa zaýyty» JShS-nyń Qoǵammen baılanys bólimi. - Kásiporynda qubyr jelisin jóndeý jumystary qolǵa alyndy, qubyr jelisiniń jaramsyz bolyp qalǵan tustaryn almastyrý boıynsha dánekerleý jumystary aıaqtaldy. Gıdravlıkalyq synaq júrgizildi, keıin bastapqy munaı óndirý bastalady».
Aıta keterligi, oqys oqıǵadan eshkim zardap shekpegen. Qazir órttiń shyǵý sebebi anyqtalyp jatyr.
«Segizinshi aqpannan bastap tehnologııalyq rejimde bastapqy munaıdy qaıta óndirý qondyrǵysy iske qosylady. Odan keıin munaıdy tereńdetip qaıta óńdeý kesheni jumysyn bastaıdy. 11 aqpannan bastap zaýyttaǵy barlyq qondyrǵylar qalypty tehnologııalyq rejimde jumys isteıdi dep josparlanyp otyr», - dep málim etti munaı-hımııa zaýytynyń baspasóz qyzmeti.
Pavlodarlyq kásiporyndaǵy munaı ónimderdi kásiporyndaǵy qorlardan tıep jatyr. Zaýyttyń deregi boıynsha, Atyraý men Shymkenttegi munaı óńdeý zaýyttary qalypty rejimde jumys istep jatyr.
Eske salaıyq, 3 aqpan kúni, saǵat 13.33-te Pavlodar munaı-hımııa zaýytynda LK-6Ý bastapqy munaıdy qaıta óńdeý qondyrǵysynyń qubyr jelisi janyp ketken. Qondyrǵy jedel túrde toqtatyldy. «Órt sóndirýshi» AQ-nyń kúshimen órt saǵat 14.13-te sóndirildi.
