Órt sóndirýshiler joldy bógep turǵan kólikterdi qaǵyp óte ala ma
ASTANA. KAZINFORM — Qazaqstan Úkimeti órt sóndirýshilerge tótenshe jaǵdaı ornyna baratyn joldaǵy kedergilerdi, onyń ishinde joldy bógep turǵan avtokólikterdi súrip ótýge ruqsat berý týraly usynysqa túsinikteme berdi.
Eske salsaq, 15 sáýirde Májilis depýtaty Oljas Quspekov Úkimet basshysynyń atyna saýal joldaǵan edi. Bul rette depýtat qutqarýshylardyń qyzmeti kezinde órt sóndirýge aparar joldaǵy kedergilerdi, sonyń ishinde avtokólikterdi súırep shyǵarýǵa ruqsat berýdi usyndy.
QR Premer-mınıstri Oljas Bektenov depýtattyq saýalǵa bergen jaýabynda zańǵa sáıkes órt sóndirý kezinde memlekettik órtke qarsy qyzmet organdarynyń qyzmetkerleri qajet bolǵan jaǵdaıda órttiń taralýyn boldyrmaýǵa jáne órtti sóndirýge baǵyttalǵan sharalardy qabyldaý úshin jabyq esikti, terezeni, shatyrdy, sondaı-aq qorshaý nysandaryn buzyp ashýǵa quqyly ekenin aıtty.
Órtti sóndirý kezinde zańdy áreket etken qyzmetkerler keltirilgen zalaldy óteýden bosatylatyny atap ótilgen («Azamattyq qorǵaý týraly» Zańnyń 63-baby). Órt qaýipsizdigi erejeleriniń talaptaryna sáıkes, shlagbaýmdar táýlik boıy kezekshi personaly bar statsıonarlyq beketpen nemese olardy qolmen ashýǵa arnalǵan qurylǵymen qamtamasyz etiledi.
— Ýákiletti organ joldy bógep turǵan kólikterdi qaǵyp ótýge ruqsat berýdi orynsyz dep sanaıdy. Óıtkeni jolda kedergiler bolǵan jaǵdaıda, órt sóndirýdiń túrli ádisteri bar. Bul rette, tyǵyz ornalasqan nysandarda órt shyqsa, is-qımyl algorıtmine sáıkes polıtsııa qyzmetkerleri órt sóndirý bólimshelerimen birlese otyryp, ótýge kedergi keltiretin kólikterdi májbúrlep kóshirýge (evakýatsııalaýǵa) shyǵady, — delingen Úkimet basshysynyń jaýabynda.
Qazirgi ýaqytta órt sóndirý kólikteriniń aýlaǵa kirý erejesin retteıtin talaptar «Órt qaýipsizdigine qoıylatyn jalpy talaptar» tehnıkalyq reglamentinde eskerilgen.
Premer-mınıstrdiń sózine qaraǵanda, órt qaýipsizdigi júıesin nyǵaıtý úshin qazir Tótenshe jaǵdaılar mınıstrligi qurylys normasyna túzetý engizýdi pysyqtap jatyr. Bul rette órt sóndirý quraldaryn ornalastyrý úshin kóppáterli úılerdiń janynan mindetti túrde arnaıy alańdar jasaqtalmaq. 15×6 metrden kem emes aýmaqta arnaıy belgi ornatylady.
Eske salsaq, 12 sáýirge qaraǵan túni Túrkistan kóshesinde ornalasqan 21 qabatty turǵyn úıdiń 15-qabatyndaǵy páterden órt shyqqan. Oqıǵa kezinde páter ishinde bir otbasy bolǵan. Órt saldarynan úsh bala mert bolyp, olardyń anasy aýyr jaraqatpen aýrýhanaǵa jetkizildi.
Osy órt kezinde jol júrisi qaǵıdalaryn buza otyryp turaqqa qoıylǵan avtokólik jedel túrde oqıǵa ornynan alynyp tastaldy. Astana Polıtsııa departamenti málimetinshe, kólik júrgizýshisi anyqtalyp, oǵan qatysty ákimshilik sharalar qoldanyldy.
Aıta keteıik, Astanadaǵy turǵyn úı kesheninde órtten zardap shekken áıeldiń jaǵdaıy aýyr ekenin jazǵanbyz.
