Órt sóndirý tehnıkasynyń kópshiligi esepten shyǵarýǵa jatady – Qanat Bozymbaev

ASTANA. KAZINFORM – 45 mlrd teńgege 1 312 órt sóndirý tehnıkasyna satyp alynbaq. Bul týraly Úkimet otyrysynda Premer-Mınıstrdiń orynbasary Qanat Bozymbaev aıtty. 

«Orman jáne tabıǵatty qorǵaý mekemeleriniń materıaldyq-tehnıkalyq jabdyqtalýy jaǵdaıyna nazar aýdarǵym keledi. Qolda bar arnaıy tehnıkanyń aıtarlyqtaı tozýy, órt sóndirý stantsııalary, munaralar men órtti erte anyqtaý júıeleri sanynyń jetkiliksizdigi tabıǵı órtterge jedel den qoıýǵa múmkindik bermeıdi. Tehnıkanyń kópshiligi esepten shyǵarýǵa jatady. Bul rette jekelegen óńirler birneshe jyl boıy osy baǵyttaǵy jumystyń tómen qarqynyn kórsetip otyr. Mysaly, tıisti jabdyqtarmen qamtylǵan Atyraý óńiri tek - 47, Túrkistan - 47, Aqtóbe - 53, Jambyl - 62, Shyǵys Qazaqstan - 63 paıyz», - dedi Premer-Mınıstrdiń orynbasary.

Onyń atap ótýinshe, bıyl Ekologııa jáne tabıǵı resýrstar, Tótenshe jaǵdaılar mınıstrlikteri jáne óńirler Ónerkásipti damytý qorynyń qarjylyq lızıngi arqyly materıaldyq-tehnıkalyq jaraqtandyrý máselelerin pysyqtap jatyr. 

«Jalpy, 45 mlrd teńgege 1 312 órt sóndirý tehnıkasyna satyp alý kózdelip otyr. Qazir múmkindik bar. Biraq, eger mınıstrlikterdiń mekemeleri lızıng satyp alý konkýrstaryn ótkizýge ótinimder jibergen bolsa, óńirler lızıng berýshilerdiń qyzmetterine aqy tóleý bóliginde oblystardyń qarjylandyrý josparyna ózgeristerdi áli engizbegen. Osyǵan baılanysty elimizdiń basym bóliginde órt qaýpi táýekelderiniń saqtalyp otyrǵanyn eskerip, Oljas Abaıuly, sizden oblystardyń ákimderine 10 tamyzǵa deıin oblys máslıhattaryna bıýdjetterge túzetýlerdi bekitý jáne satyp alý sharalaryn qabyldaý úshin tısti tapsyrma berýińizdi suraımyn», - dep ótindi Qanat Bozymbaev Premer-Mınıstrden. 

Óz kezeginde Úkimet basshysy tıisti tapsyrmasyn hattamaǵa engizýdi júktedi.