Órt sóndirý salasynda 25 jyl qyzmet ettim – Qarlyǵash Zapevalova
ÓSKEMEN. KAZINFORM – Óskemende turatyn Qarlyǵash Zapevalova talaı jylyn azamattyq qorǵaý organyna arnaǵan jan. Búginde 75-ke kelgen zeınetker bir kezderi órt sóndirý bólimin basqarǵan.
Qarlyǵash Zapevalova qurmetti demalysqa podpolkovnık shenimen shyqqan. Jigerli, qaısar minezdi áıeldiń sońǵy jumys orny – Óskemen qalasyndaǵy №29 qosymsha bilim berý ortalyǵy-mektebi. Ol jaqta tájirıbeli maman balalarǵa tótenshe jaǵdaılar kezindegi qaýipsizdik erejelerin úıretýmen aınalysqan.
«Azamattyq qorǵaý organyndaǵy eńbek ótilim 1976 jyly bastaldy. Órt qaýipsizdigi nusqaýshysy bolyp jumysqa turdym. Biraz ýaqyttan soń qaladaǵy jıhaz kombınatynyń janyndaǵy №2 órt sóndirý bólimine aýystym. Onda qyzyl jalynmen qalaı kúresý qajettigin jan-jaqty meńgerip, jıhaz kombınatyn da bes saýsaǵymdaı bilip aldym. Onyń qaýipsizdigin qalaı qamtamasyz etý qajettigin de tolyqtaı úırendim. Osylaısha, 3 jyldan keıin osy órt sóndirý bóliminiń bastyǵy bolyp taǵaıyndaldym», - dep eske aldy ol.
Názik jandy ekenine qaramastan, jumysqa bilek sybana kirisip, kombınat tsehtarynda bolǵan barlyq órtke baryp otyrǵan. Onyń qaramaǵynda 16 órt sóndirýshi jumys istedi.
«25 jyl ǵumyrymdy osy qyzmetke arnadym. Erlerdiń jumysy dep qoryqqan emespin. 2005 jyly ShQO TJD kadr qyzmeti bólimine jumysqa aýystym. Bul bólimde jas órt sóndirýshilerdi qyzmetke qabyldaýmen aınalystyq. 4 jyl eńbek etip, zeınetkerlikke shyqtym», - deıdi Qarlyǵash Zapevalova.
Qazir jasy 75-ke kelse de onyń qımyly shıraq, sanasy sergek. Jas býynǵa aqylyn, kórgen-bilgenin aıtýdan sharshamaıdy.
«Eshqashan qıyndyqtan qoryqqan emespin. Qandaı jaǵdaı bolmasyn beldi bekem býyp, amal ettik. Ulym Dmıtrıı meniń jolymdy qýyp, zeınetkerlikke shyqqanǵa deıin Óskemendegi órt sóndirý bóliminde ter tókti. Óz mamandyǵymdy jaqsy kórdim. Qazirge deıin TJD bólimshelerine baryp turamyn. Qutqarýshylarǵa jol nusqap, qoldaý bildiremin. Taǵdyryma rızamyn. Óıtkeni men ómir jolymda qaısar, jany jaısań adamdarmen qyzmettes boldym», - deıdi zeınetker.
