Órt sóndirý quraldary bolmady – hosteldegi órt oqıǵasynyń kýágeri
ALMATY. KAZINFORM – Almatyda 13 adam ólim qushqan hosteldegi órt boıynsha sot otyrysy jalǵasyp jatyr.
Іs Almaly aýdandyq sotynda sýdıa Ernar Qasymbekovtiń tóraǵalyǵymen qaralyp jatyr. QR Qylmystyq kodeksiniń 292-babynyń 3-bóligi (Abaısyzda eki nemese odan da kóp adamnyń ólimine ákep soqqan órt qaýipsizdigi talaptaryn buzý) boıynsha eki adamǵa aıyp taǵylyp otyr. Olar – Ádilbek Muhamedıarov pen Aleksandr Pekelnık.
Kezekti sot otyrysynda hostel ákimshisi Tatıana Gvozdınadan jaýap alyndy.
Aıtýynsha, qarasha aıynyń basynda jumysqa ornalasqan. Ol hostelde kúıeýimen birge turǵan, onyń negizgi mindeti – hostelge kelgen adamdardy tirkeý jáne tártipti qadaǵalaý.
«Órt tańǵy saǵat 5:30-da shyqty. Bul ýaqytta men qabyldaý bólmesinde uıyqtap jatqan edim. Dabyl dybysynan oıanyp kettim. Men jigitterdiń dalaǵa júgirip shyǵyp bara jatqanyn kórdim, artynsha tútin shyqty. Dúrbeleń bastalyp ketti. Syrtqa birinshi bolyp jertólede turatyndar shyqty», - deıdi ol.
Sonymen qatar kýáger ǵımarattan jalpy evakýatsııalyq jospardy baıqamaǵanyn jetkizdi.
«Hostelde evakýatsııalaý baǵytyn kórsetetin jospardy kórmedim. Ǵımaratta órt sóndirý quraldary bolǵan joq. Maǵan eshkim órt qaýipsizdigi boıynsha is-qımyldardy túsindirgen joq. Biraq, órt dabyldary boldy jáne avtomatty túrde iske qosyldy», - dedi Tatıana Gvozdına.
Osyǵan deıingi sot otyrysynda sottalýshy Ádilbek Muhamedıarovtyń jubaıy Botagóz Muhamedıarova tergeý barysynda qasaqana órteý deregi boıynsha qylmystyq is qozǵalǵanyn málimdegen edi.
Sondaı-aq prokýror Nurazhan Myrzaly aıyptaý aktisin oqyǵan bolatyn.
Prokýrordyń sózinshe, aıyptalýshy Muhamedıarov ǵımarattyń fýnktsıonaldyq maqsatyn ózgertip, jóndeý jumystaryn júrgizgen. Sonymen qatar jalǵa alýshy ol jerde órt qaýipsizdigi talaptaryn saqtamaǵan. Dálizge tósekter ornalastyryp, birinshi qabattaǵy evakýatsııalyq esikti jıhazdarmen jaýyp tastaǵan. Sondaı-aq jertóleniń avarııalyq shyǵý esikterin bekitip qoıǵan.
Pekelnık órtten qorǵaý júıelerin jobalaýǵa qajetti lıtsenzııasynyń joqtyǵyna qaramastan, qoldanystaǵy dabyl júıesin vızýaldy tekserip, dıagnostıka júrgizgen. Biraq ol bólmelerdiń fýnktsıonaldyq maqsattary men erekshelikterin eskermedi.
Eske salaıyq, 2023 jyldyń 30 qarashasynda Ádı Sháripov, 86 mekenjaıy boıynsha «Almaty Hostel» hosteli órtengen bolatyn.
Tótenshe jaǵdaı departamentine órt týraly habarlama 05:33-te túsken. Órt saldarynan hostelde 13 adam qaıtys boldy.
Mert bolǵan 13 adamnyń tórteýi – sheteldikter (Reseı Federatsııasynyń 2 azamaty jáne Ózbekstannyń 2 azamaty), qalǵan toǵyzy – Qazaqstan Respýblıkasynyń azamattary.
Keıinirek órtengen hosteldiń ıeleri belgili boldy.
Hostel ǵımaraty Halyk Bank-ke tıesili. Ony jalǵa alǵan – «ALA Hostel» JShS. Jaldaý týraly kelisimshart 2023 jyly 21 qyrkúıekte jasalǵan.
Ótken jyldyń jeltoqsan aıynda hosteldiń basshysy ustaldy.
