Órt sóndirý beketinen chempıondyq tuǵyrǵa deıin: mańǵystaýlyq qutqarýshynyń joly
AQTAÝ. KAZINFORM — Mańǵystaýlyq órt sóndirýshi Mels Sarybaev qyzmet pen sportty qatar alyp júr. Ol krossfıtten oblystyń jeti dúrkin chempıony atanyp, kópqabatty ǵımarattyń 25-qabatyna ýaqytqa kóterilý saıysynda úsh ret jeńiske jetken. Qazir tájirıbeli maman áriptesterin de jarystarǵa daıyndaıdy. Kazinform tilshisimen suhbatynda ol qaýipti mamandyqtyń ereksheligi men sporttaǵy jetistikteri týraly aıtyp berdi.
— Órt sóndirý salasyna qalaı keldińiz?
— Bala kezimnen áskerı kıim kıip, elge qyzmet etýdi armandadym. Sportpen de erte aınalysa bastadym. 2015 jyly tótenshe jaǵdaılar salasyna jumysqa ornalastym. Qazir bólimshe komandıri, starshına bolyp qyzmet etemin. Tańdaýyma ókinbeımin, kerisinshe, ózim qalaǵan ispen aınalysyp júrgenime qýanamyn.
— Órt sóndirýshige qandaı qasıetter qajet?
— Eń aldymen, shapshańdyq, tózimdilik jáne sabyrlylyq kerek. Órt kezinde ár sekýnd mańyzdy. Tútin basqan ǵımarattan adam izdeý, kedergilerden ótý ońaı emes. Mundaıda qorqynysh ta bolady. Biraq tájirıbe men daıyndyq abdyrap qalmaı, durys sheshim qabyldaýǵa kómektesedi.
— Sporttaǵy basty jetistikterińiz qandaı?
— Krossfıtten Mańǵystaý oblysynyń jeti dúrkin chempıony atandym. Kópqabatty ǵımarattyń 25-qabatyna ýaqytqa kóterilý saıysynda úsh ret jeńiske jettim. Arqan tartýdan oblys chempıony boldym. Órt sóndirýshiler arasyndaǵy jarystarda jeke jáne komandalyq esepte joǵary nátıjelerge qol jetkizip, Qazaqstan chempıonattarynda óńir namysyn qorǵadym. Sport qyzmetime de kómektesedi. Órt sóndirýshilerdiń jarystarynda kúshpen qatar tózimdilik, shapshańdyq jáne naqty áreket etý qabileti synalady.
— Qazir ózińiz de áriptesterińizdi jattyqtyrasyz.
— Iá, bıyldan bastap arnaıy sport kesheninde órt sóndirý bólimderiniń qyzmetkerlerin daıyndaýǵa jetekshilik etemin. Olardy jarystarǵa ázirlep, tájirıbemmen bólisemin.
— Qyzmet barysynda este qalǵan oqıǵalar boldy ma?
— Bizdiń tájirıbemizde bir táýlikte 21 órt oqıǵasyna barǵan kez boldy. Keıde birneshe saǵattyń ishinde qatarynan shaqyrtýlar túsedi. Mundaıda ár mınýtty tıimdi paıdalaný kerek.
— Shaqyrtý kezinde oqıǵa ornyna jetýge qandaı kedergiler kezdesedi?
— Qazir qalada kólik kóp. Ásirese kópqabatty úılerdiń arasyndaǵy tar joldar, retsiz qoıylǵan kólikter men keptelister órt sóndirý tehnıkasynyń qozǵalysyn qıyndatady. Bizdiń № 2 mamandandyrylǵan órt sóndirý bóliminde 72 qyzmetker eńbek etedi. Bólimshe Aqtaýdyń 10-15-shaǵynaýdandarynan bastap 29 «A» shaǵynaýdanyna deıingi aýmaqqa jaýap beredi. Turǵyndardan órt sóndirý kóliginiń dabylyn estigende jol berýin suraımyz. Keıde birneshe mınýttyń ózi adam ómirin saqtap qalýǵa áser etedi.
— Turǵyndarǵa órt qaýipsizdigi jóninde qandaı keńes berer edińiz?
— Eń aldymen, úıdegi elektr symdary men gaz jabdyqtarynyń jaramdylyǵyn tekserip otyrǵan jón. Elektr quraldaryn qaraýsyz qaldyrmaý, balalardyń otpen oınaýyna jol bermeý kerek. Qart adamdardyń qaýipsizdigine de erekshe nazar aýdarǵan durys.
Órt shyqqannan keıin ony sóndirýmen ǵana shektelmeı, aldyn alý sharalaryna mán bergen mańyzdy. Qaýipsizdik erejelerin saqtaý ár adamnyń jaýapkershiligine baılanysty. Turǵyndar qarapaıym talaptardy oryndasa, kóptegen tótenshe jaǵdaıdyń aldyn alýǵa bolady.
Buǵan deıin Astanada egiz aǵaıyndy qutqarýshy bolyp birge qyzmet etetinin jazǵanbyz.
