Órt sóndirý beketi, 12 baspana: qyzylordalyq metsenat aýylyn kórkeıtýge úles qosyp júr
QYZYLORDA. KAZINFORM – Qyzylorda oblysy Qarmaqshy aýdanynyń Aqtóbe aýylyndaǵy sharýashylyq basshysy Ábdihamıt Aralbaev aýyldyq jerde órt sóndirý beketin salýǵa demeýshilik kórsetip, el qaýipsizdigin qamtamasyz etýge úles qosqany úshin jýyrda «Eren eńbegi úshin» medalin ıelendi.
Quny 50 mln teńge bolatyn beket bıyl qyrkúıekte «Aýyl qutqarýshysy» jobasy aıasynda paıdalanýǵa berildi.
- Bul nysan tótenshe jaǵdaılar kezinde jedel áreket etýge, órttiń aldyn alýǵa jáne turǵyndardyń ómiri men múlkin qorǵaýǵa múmkindik beredi. Aýyldyń ınfraqurylymyn jaqsartýǵa, odan buryn eldiń amandyǵy men turǵyndardyń qaýipsizdigin qamtamasyz etýge osylaı janashyrlyq tanytqymyz keldi, - dedi Ábdihamıt Aralbaev.
Áleýmettik mańyzy bar nysannyń qurylysyna demeýshilik jasaǵan kásipkerdiń esimi «Ońtalap» sharýa qojalyǵynyń jetekshisi retinde jaqsy tanys. 1998 jyly shaǵyn qojalyq retinde ashylyp, 2015 jyldan bastap irilengen qurylymǵa aınalǵan kásiporynnyń júrip ótken joly kópke úlgi. Osy aralyqta sharýashylyq aýyldyń aıaqqa turýyna aıtarlyqtaı yqpal etti.
- Bıyl jalpy kólemi 1265 gektar jerge aýyl sharýashylyǵy daqyldaryn ektik. Onyń 661 gektary – kúrish, 294 gektary – jańa jońyshqa, 310 gektary – eski jońyshqa. Qazirgi kúni sharýashylyqta 45 adam turaqty jumyspen qamtylǵan. Qyzmetkerlerdiń jalaqysy ýaqytyly tólenip, olardyń áleýmettik jaǵdaıyna udaıy kóńil bólemiz. Budan bólek, sharýa qojalyǵy eńbekkerler men jer úleskerlerine qoldaý kórsetip keledi, - dedi keıipkerimiz.
Sharýashylyqtyń qoldaýy óndiristik qyzmetpen ǵana shektelmeıdi. Kásipker qoǵamdyq sharalarǵa demeýshilik kórsetip, turǵyndardyń ál-aýqatyn arttyrýǵa baǵyttalǵan bastamalarǵa da atsalysyp júr.
- Bıyl mádenı-buqaralyq jáne merekelik is-sharalardy uıymdastyrýǵa jalpy kólemi 1,6 mıllıon teńge qarajat bólindi. Quny 30 mıllıon teńge bolatyn sport alańyn salyp, aýyl balalarynyń sportpen shuǵyldanýyna jaǵdaı jasadyq. Bul nysan jas urpaqtyń salaýatty ómir saltyn ustanýyna jáne buqaralyq sporttyń damýyna múmkindik bereri sózsiz. Áleýmettik qoldaýdyń taǵy bir mańyzdy baǵyty – turǵyn úımen qamtamasyz etý. Baspanaǵa muqtaj otbasylarǵa 12 turǵyn úı satyp alyp, ıelerine kiltti tabystadyq. Budan bólek Aqtóbe aýylyndaǵy 150 adamǵa arnalǵan Ábý Hanıfa meshitiniń qurylysyna 35 mıllıon teńge kóleminde qarjylaı qoldaý kórsettik, - dedi kásipker.
Ábdihamıt Aralbaevtyń aýyldy damytýǵa baǵyttalǵan bastamalary jergilikti turǵyndardyń turmys sapasyn jaqsartýǵa, jańa múmkindikter qalyptastyrýǵa jáne qoǵamdyq mańyzy bar máselelerdi sheshýge sep. Kásipker «Eren eńbegi úshin» medaliniń keýdesinde jarqyraýy aýyl sharýashylyǵyn damytýdaǵy, turǵyndardy jumyspen qamtýdaǵy jáne el ıgiligine arnalǵan áleýmettik jobalardy júzege asyrýdaǵy eńbeginiń baǵalanýy dep esepteıdi.
Eske salaıyq, tamyz aıynda Memleket basshysynyń qabyldaýynda bolǵan Tótenshe jaǵdaılar mınıstri Shyńǵys Árinov Elimizde 237 erikti órt sóndirý beketi salynǵanyn jetkizdi.
