Órt sóndirýshiler jalǵan aıyptaýdan soń qyzmetin atqarýdan jasqanshaqtap qaldy - Ekishev
Eske sala keteıik, Ashat Sultanov esimdi paıdalanýshy Feısbýkte Astanadaǵy páterinde órt bolǵany týraly habarlaǵan edi. Ol kezde páterde eshkim bolmaǵan.
Turǵynnyń aıtýynsha, úıinde áıeliniń mashınasyn satqan aqsha jáne taǵy bir dúken ashý úshin jınaǵan aqsha - 15 mıllıon teńge jáne 8 myń dollar bolǵan. Ashat Sultanov aqshanyń joǵalýyna órt sóndirýshilerdi aıyptaǵan bolatyn.
Budan keıin Astanada órtengen páterden qomaqty aqshanyń qalaı joǵalǵany anyqtaldy. Atalmysh páterden iri kólemde aqsha urlap, izderin jasyrý úshin ony órtep ketken kúdiktiler ustaldy.
Búgin Ashat Sultanov Elordadaǵy №16 mamandandyrylǵan órt sóndirý bóliminiń ǵımaratynda órt sóndirýshilerden kelip keshirim surady. Al Órt sóndirý qyzmeti bastyǵynyń orynbasary Rýslan Ekishev dálelsiz aıyptaýdyń saldary ońaıǵa soqpaǵanyn aıtyp berdi.
«Siz áleýmettik jelide jazba jazyp, órt sóndirýshilerdi aıyptadyńyz. Bul jaǵdaı qoǵamda birshama rezonans týdyrdy. Áleýmettik jelilerde bizge qanshama kir jaǵylyp, «mıllıondar urlandy» degen syńaıdaǵy jasalmaǵan urlyqty bizge tańa bastady. Eń qıyny, sol oqıǵada órt sóndirgen jigitterdiń úılerin erteńgi kúni tinte bastady. Tintýdiń qatań júrgizilgeni sonshalyq, barlyq kórshi-qolańnyń aldynda órt sóndirýshilerimiz ury sekildi kórinip qaldy. Keıbir jigitter ózderiniń týystarynyń úıinde turyp jatqan. Olardy úıinen shyǵaryp jiberdi. Ózińiz aıtqandaı, tergeýshiler orderdi kórsetip, úıdi tintip, úıdi bastan-aıaq tóńkere teksergen», - dedi Rýslan Ekishev.
Onyń aıtýynsha, órt sóndirgen bir jigittiń áıeliniń aıaǵy aýyr bolǵan.
«Oǵan qanshalyqty aýyr boldy. Mundaı jaǵdaıdan keıin tipti órtenip jatqan úıge kirip, jalyndy sóndirýge nıetińdi qurtyp jiberetindeı jaǵdaı boldy. Áleýmettik jelilerde taraǵan sózdiń keselinen úı ıesi joq páterge kirsek, sol adam joq aqsha týraly aıtyp aıyptaǵysy keledi. Osydan keıin-aq bári de bizden osyndaı zatty urlap ketti dep jaza bastady. Shynymyzdy aıtsaq, árbir órt sóndirýshi óz qyzmetin atqarýdan jasqanshaqtap qaldy. Bizdiń abyroıymyzǵa nuqsan keldi», - dep túıdi Rýslan Ekishev.