Órt sóndirýshiler qataryna qabyldanǵan jas qyzmetkerler ant berdi (FOTO)
ALMATY. QazAqparat - Almatyda órt sóndirýshiler qataryna alynǵan jas sarbazdar ant qabyldady. Saltanatty shara 20 mamyr temirjoldaǵy jarylysta qaza bolǵan 9 órt sóndirýshini eske alý kúnine oraı ótkizildi.
Qalalyq TJD baspasóz qyzmetiniń habarlaýynsha, bıyl órt sóndirý gornızony 150 jańa sarbazben tolyqty.
Jınalǵandar qaza bolǵandardy bir mınýt únsizdikpen eske aldy.
Aıta ketý kerek, qaıǵyly oqıǵa 1989 jyly 20 mamyrda Almaty-2 vokzalynda oryn alǵan edi.
Eki teplovozdyń soqtyǵysýynan gaz toltyrylǵan 1 tsısterna zaqymdanyp, órt shyqqan edi. Ekinshi tsısternadaǵy gaz atylǵan kezde 300 metrlik bıiktikke shapshyǵan jalyn mańyndaǵylardy órtep jibergen bolatyn.
Órt sóndirýshilerdiń eren eńbeginiń arqasynda qalǵan gaz toly 4 tsısterna qaýipsiz jerge jetkizilip, tolassyz jarylystyń aldyn alý múmkin boldy.
Otpen alysyp júrip qaza bolǵan 9 órt sóndirýshiniń erliginiń arqasynda úıler men adamdar aman qaldy.
I.F.Safargalıev, R.S.Qasymov, S.K.Álimtaev, I.A.Abdranov, F.A.Sháripov, K.Aqqulov, E.K.Ysqaqov, V.V.Nıkýlenko men M.I. Málikov «Qyzyl juldyz» ordenimen marapattaldy.
Osy ýaqyttan bastap Almaty órt sóndirý gornızonyna qabyldanǵan jas sarbazdar 20-mamyrda ant beredi.
