Órt sóndirýshiler Astanada jańa týǵan balany tilsiz jaýdan qutqaryp qaldy
ASTANA. QazAqparat - Elordanyń órt sóndirýshileri erlik tanytyp, kireberisi órtke oranǵan úıden bir áıel adam men jańa týǵan qyz balany qutqardy, dep habarlaıdy Astana qalasy Tótenshe jaǵdaılar departamentiniń baspasóz qyzmeti.
Seısenbi, 8 jeltoqsan kúni tańǵy saǵat 09:46-da «101» pýltine Kúıshi Dına,88 mekenjaıynda ornalasqan úıdiń birinshi qabatyndaǵy páter órtenip jatqany týraly habar keledi. Bes mınýtqa jeter-jetpes ýaqytta oqıǵa ornyna jetken órt sóndirýshiler birinshi qabattan qoıý tútin shyǵyp jatqanyn kórip, joǵarǵy qabattaǵy páter turǵyndaryna qaýip tónip turǵanyn eskeredi.
«Órt sóndirýshiler eń aldymen turǵyndardy izdep, olardy qutqarýǵa kirisedi. Gaz ben tútinnen qutqarý qyzmetiniń eki bólimi joǵarǵy qabattaǵy páterlerdi tekserýge attanady. Osylaısha, órt sóndýri qyzmetiniń aǵa serjanty D.Ýálıev bastaǵan órt sóndirýshiler ekinshi qabatta kidirip qalǵan áıel adamdy qutqarady. Al órt sóndirý qyzmetiniń aǵa leıtenanty Aıdos Álıev órt bastalǵan kireberistegi páterlerdiń birinen 2015 jyly týǵan náresteni qutqaryp shyqty»,-dep habarlaıdy tótenshe jaǵdaılar departamentiniń baspasóz qyzmeti.
Jalpy, tilsiz jaý saǵat 10.08-de tolyqtaı aýyzdyqtalǵan. Órt aýmaǵy 2 sharshy metrdi quraǵany anyqtalyp otyr.
