Órt sóndirýshiler Almaty turǵyndaryn pırotehnıkalarǵa abaı bolýǵa shaqyrdy
ALMATY. QazAqparat - Almatynyń órt sóndirýshileri Jańa jyl keshinde pırotehnıkalardyń kesirinen tutanatyn órtten qalaı saqtanýǵa bolatynyn túsindirdi, dep habarlaıdy QazAqparat tilshisi.
Jańa jyl qarsańynda bazarlar men dúkender ot shashý quraldaryna tolatyny belgili. Mereke túnderi pırotehnıkalardy qoldanǵanda qaýipsizdik sharalary saqtalmaı, kópqabatty úıler órtenip jatatyn oqıǵalar da az kezdespeıdi. Osyǵan baılanysty, Jańa jyl qarsańynda órt sóndirýshiler almatylyqtardy saqtyq sharalaryn eskerýge shaqyrdy.
«Jańa jyl merekesi kúnderi Almatydaǵy órtterdiń 40 paıyzy pırotehnıkalardy durys qoldanbaǵannan bolady. Ásirese, kópqabatty turǵyn úı keshenderinde qaýipsizdik tehnıkasy saqtalmaıdy, atylǵan petardalar balkondarǵa, jer úılerdiń shatyrlaryna túsip órt shyǵady. Ótken Jańa jyl túni bolǵan 10 órttiń 3-eýi pırotehnıkalardyń kesirinen boldy», - dedi Almaty qalasy TJD-niń Órt qaýipsizdigi boıynsha baqylaý-profılaktıkalyq qyzmeti basqarmasynyń basshysy Marat Bekbaev.
Statıstıka málimetterine súıensek, 2014-2016 jylǵy Jańa jyl keshterinde pırotehnıkalardan 162 adam zardap shekken, onyń 76-sy balalar. Aýrahanaǵa jetkizilgenderdiń jasy 3-ten 58 jas aralyǵynda. Degenmen, bul kórsetkish jyl ótken saıyn azaıyp keledi.
Aıta keteıik, jyl saıyn zańsyz satylatyn pırotehnıkalardyń anyqtaý boıynsha qalalyq TJD men ІІD qyzmetkerleriniń birlesken sharasy 20 jeltoqsannan bastalady. 2015 jyly vedomstvoaralyq tekserý kezinde 1000 keli qaýipti pırotehnıka tárkilensa, 2016 jyly 4 475 pırotehnıka alynǵan.
«Pırotehnıkalardy satyp alarda satýshylardan taýardyń sertıfıkatyn talap etińiz. Sondaı-aq, onyń deformatsııaǵa ushyramaǵanyn, dymqyldanyp qalmaǵanyn qadaǵalańyz. Pırotehnıkalardy negizinen arnaıy dúkenderden alǵan durys. Bazarlardan da alýǵa bolady. Eń bastysy, saýda ornynyń órt qaýipsizdigi erejelerin saqtaǵanyna mán berińiz», - dedi M.Bekbaev.
Sonymen qatar, ol pırotehnıkalardy qoldanǵanda tehnıkalyq qaýipsizdikke mán berý kerektigin eskertti.
«Pırotehnıkalardy qoldanǵanda balalaryńyzdy baqylaýda ustańyz. 14 jasqa tolmaǵan balalardy petardalar atylatyn jerge jibermeńiz. Pırotehnıkalardy alańqaıda, elektr qoraby men balkonnan alys jerde qoldaný qajet. Petardany alǵash tutatqanda janbasa, qaıtalap tutpańyz. Ony turǵyn úıden 50 metr qashyqtyqta qoldaný kerek. Bengal shamdaryn qoldanyp bolǵasyn qoqys jáshigine tastamańyz», - dep eskertti M.Bekbaev.
Sonymen qatar, órt sóndirýshiler úıdegi shyrshaǵa elektrogırlıandalardy ilerde toq ótetin symnyń jaramdylyǵyna kóz jetkizip alýdy eskertti.
