Órt sóndirýshi qyzmetiniń el bilmeıtin qyrlary
Órt sóndirýshiler jumysy eń qaýipti jumystardyń tiziminde tur. Negizinen qutqarýshylar aýysymmen jumys isteıdi. Al eger qandaı da bir tótenshe jaǵdaı bolsa, onda esh úzilissiz ter tógýge daıyn.
«Órt sóndirýshiniń kıimin jasaý úshin 150 gradýsqa deıingi temperatýraǵa tótep bere alatyn arnaıy mata qoldanylady. Sonymen qatar, ol kontsentratsııalanǵan qyshqyldar men siltiniń áserinen qorǵaıdy. Osynyń arqasynda órt sóndirýshiler adamdardy janyp jatqan úılerden alyp shyǵa alady», - dep habarlady oblystyq TJD baspasóz qyzmeti.
Jumys qaýipti ári óte aýyr. Óıtkeni, kúndelikti kıetin kıim salmaǵy 30 kelige jetedi. Munyń bári kıimniń neden jasalǵanyna jáne ózimen alyp júrgen jabdyqtarǵa baılanysty. Osyndaı jaǵdaılardy eskere otyryp, órt sóndirýshiniń jumysyna tek fızıkalyq turǵyda jaqsy daıyndalǵan azamattar ǵana jaraıtyny túsinikti.
«Órt týraly habar kelgende, bólimshe qyzmetkerlerine formany kıip, oqıǵa ornyna barý úshin jınalýǵa nebári 60 sekýnd bar. Sol úshin arnaıy kıimderdi erekshe ádispen daıyndap qoıý shart. Mysaly, órtte kıetin kúrte aldyn ala teris aýdarylyp, sondaı-aq shlem, shalbar, órt beldigi belgili bir tártippen ornalasady», - delingen aqparatta.
Kólikte 5 tonnadaı sýdy saqtaıtyn tsısterna bolady. Ár mashınada sýdy tez toltyrýǵa arnalǵan sorǵy bar.
«Órt sóndirýshilerdiń jumysy týraly fılmderde olardyń janyp jatqan ǵımaratta qalaı ońaı qozǵalatyny jáne zardap shekkenderdi nemese shyǵý ornyn tez tabatyny kórsetiledi. Biraq, shynaıy ómirde bári kerisinshe. Tútin saldarynan janyp jatqan úıde eshteńe kórinbeıdi. Al laýlap jatqan ot dybysynan eshteńe de, tipti adamdardyń aıǵaıy da estilmeıdi. Dese de, mundaı jaǵdaıda maskany sheship tastaýǵa bolmaıdy. Áıtpese, órt sóndirýshi tunshyǵyp qalýy múmkin. Sondyqtan, qutqarýshylar janyp jatqan bólmelerde kolmen qabyrǵany sıpap júrip qozǵalady», - deıdi baspasóz qyzmetiniń mamandary.
Foto: ShQO TJD
