Órt sóndirýshi erli-zaıypty zeınetkerdi ajaldan aman alyp qaldy - SQO
PETROPAVL. QazAqparat – Soltústik Qazaqstan oblysynyń Ǵ.Músirepov aýdanynda demalysta júrgen órt sóndirýshi Іlııas Bahmanov otqa oranǵan úıden eki adamdy alyp shyǵyp, ólimnen aman alyp qaldy, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, oqıǵa 5 aqpan túngi saǵat 2.00 shamasynda Novoıshımka eldi mekeninde bolǵan. Ǵ.Músirepov aýdandyq №16 órt bólimi bastyǵynyń orynbasary, 26 jastaǵy Іlııas Bahmanov kele jatyp, Engels kóshesindegi 8 úıdiń janyp jatqanyn baıqaıdy. Turǵyn úıdiń shatyryn jaılaǵan jalyn, qora-jaıǵa aýysa bastaǵan.
«Birden úıge júgirdim. Esikti ashylmady, ishinen jabylypty. «ıAǵnı, úıde adamdar bar, olarǵa tez kómektesý kerek» degen oı keldi. Órtke qarsy qyzmettiń jaýyngerlik jarǵysyna saı birden kezekshi bólimge habar berdim de, kireberistiń terezesin syndyryp, ishke kirdim. Qoıý tútinniń arasynan uıyqtap jatqan áıeldi taptym. Oıatyp, taza aýaǵa alyp shyqtym», - deıdi Іlıas ótken túndi eske alyp.
Dalada esin jıǵan 63 jastaǵy áıel úıde 68 jastaǵy kúıeýiniń qalǵanyn aıtqan.
«Bári sanaýly mınýtta bolǵanymen, maǵan uzaq ýaqyt ótkendeı kórindi. Jalyn kúsheıe túskendikten úıge kirýge seskengenimdi jasyrmaımyn, biraq, ishtegi adamdy alyp shyǵýǵa bel býdym. Tútinnen dym kórinbeıdi. Túrtinektep júrip, túkpir bólmelerdiń birinen es-tússiz jatqan er adamdy taýyp, arqalap alyp shyqtym. Alǵashqy kómek kórsetip, jedel járdem qyzmetin shaqyrdym. Bul ýaqytta áriptesterim de jetip úlgergen edi», - deıdi Іlııas.
Órt sóndirýshiler «Hlebnaıa baza №2» JShS kómegimen órtti der kezinde aýyzdyqtady. Úıden 4 gaz ballony shyǵaryldy. Jalynnan úıdiń shatyry jáne jaqyn ornalasqan qora-jaı zaqymdandy. Úıdiń ishi men dúnıe-múlikke zaqym kelgen joq.
