Órt sóndirýshi er adamdy janyp jatqan úıden alyp shyqty
ORAL. QazAqparat - Batys Qazaqstan oblysynda órt sóndirýshi er adamdy janyp jatqan úıden alyp shyqty, dep habarlaıdy QazAqparat tilshisi.
BQO TJ departamentiniń baspasóz qyzmetinen túsken málimetke qaraǵanda, óńirde óz mindetin minsiz atqaryp júrgen qyzmetkerlerdiń biri - Bórli aýdanynda ornalasqan №8 órt sóndirý bóliminiń bólim komandıri, azamattyq qorǵaý starshınasy Janbolat Botashev.
Qaratóbe aýdanynda týyp-ósken qyryq jasar J.Botashev qyzmetten tys ýaqytta da oqys oqıǵa bola qalǵan jaǵdaıda durys sheshim qabyldap, jedel áreket jasaı biledi. Buǵan 24 qańtar kúni saǵat 14.00-de Aqsaı qalasyna qarasty Qyzyltal aýyly Aqsýat kóshesi 34-úıde bolǵan órt dálel. Sol kúni úıinde demalysta bolǵan ol kórshi úıdiń esigi men terezesinen ot shyǵyp jatqanyn kóredi de, dereý inisi Qumarǵalı men uly Jandosqa sý aıdaý motoryn qosyp, sý tasýdy buıyryp, ózi órt ornyna qaraı júgiredi.
«Bara jatyp, 101 telefony arqyly áriptesterime habarlap, aldymen kireberisti sý shashyp sóndirdim. Sosyn eńbektep, ortańǵy bólmege óttim, jer ústel kedergi bolmasyn dep, alyp tastamaqshy bolǵanda, qolyma adam denesi ilikti. Kóterisýge kórshim men inimdi shaqyryp, syrtqa alyp shyǵyp, jerge kilemshe tósep jatqyzdyq. Úı janyndaǵy kólikti dereý dárigerge jiberip, jedel járdem kelgenshe, zardap shegýshini kilemmen kóterip, kórshi úıge kirgizip, kómek kórsettik. Keıin №8 órt sóndirý bóliminiń jeke quramy kelip, «tilsiz jaýdy» tolyqtaı aýyzdyqtady», - dedi Janbolat Lesuly.
Órtten aman qalǵan 1958 jyly týǵan turǵyn qazirgi kezde Bórli aýdandyq ortalyq aýrýhanasynda em alyp jatyr. Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, onyń jaǵdaıy turaqty aýyr. Oksıgenatormen tynys alýda.
