Órt sóndirýshi bolýdy bala kezden armandadym - Araılym Qajytaeva

KÓKShETAÝ. QazAqparat – Araılym Qajytaevanyń esimi qazir sportsúıer qaýymǵa jaqsy tanys. Býrabaı aýdanynyń Şýche qalasynda týyp, ósken sport sheberiniń talaby taýdaı, armany asqaq, dep habarlaıdy QazAqparat tilshisi.

Sońǵy kezderi halyqaralyq dúbirli dodalarda sportshy qyzdarymyz tepse temir úzetin jigitterimizden qalyspaı, elimizdiń abyroıyn asqaqtatyp, dańqyn asyryp keledi.

Sondaı arýlarymyzdyń biri – esimi qazir sportsúıer qaýymǵa jaqsy tanys, taekvondoda Qazaqstan Respýblıkasynyń sport sheberi Araılym Qajytaeva der edik.

Búgingi tańda ol Kókshetaý qalasynyń №2 mamandandyrylǵan órt sóndirý bóliminiń órt sóndirýshi-qutqarýshysy bolyp qyzmet istep júr.

Órt sóndirýshi-qutqarýshy - eń qaýipti jáne aýyr mamandyqtardyń biri sanalady jáne de ony kóbine er adamdar tańdaıdy.

Jyljymaly úsh satyly baspaldaqpen bıiktikke kóterilip, apparatta jáne aýyr jabdyqta qalyń tútinmen qozǵalý, fızıkalyq jaǵynan damyǵan, ártúrli jaǵdaılarda tez jáne saýatty áreket ete bilý, biraq eń qıyny - bireýdiń ómirin saqtap qalý úshin, óz ómirińizdi qaterge tigýge daıyn bolý qajet.

Osynyń barlyǵy qarshadaı qyz Araılymnyń boıynan tabylyp otyr.

Jumysynyń aýyrlyǵyna qaramastan, ol ıyq tirestirip júrgen áriptesteriniń aldy bolýda.

Ol bala kezinen órt sóndirýshi kıimin kıip, tótenshe jaǵdaılar salasynda qyzmet isteýdi armandapty. Armany ony adastyrmaı, osy mamandyqqa alyp kelgen.

«Respýblıkalyq sport mektebin bitirgen soń Shoqan Ýálıhanov atyndaǵy Kókshetaý memlekettik ýnıversıtetinde «zań ǵylymdarynyń magıstri» baǵyty boıynsha oqydym. 2020 jyly Aqmola oblysy TJD Órt sóndirý jáne avarııalyq-qutqarý jumystary qyzmetine jumysqa ornalastym. Qazaqstan Respýblıkasy TJM Kókshetaý tehnıkalyq ınstıtýtynyń aımaqtyq oqý ortalyǵynda órt sóndirýshi-qutqarýshylardyń alǵashqy daıyndyǵynan óttim», - deıdi ol.

Sonymen qatar, ol 2018 jyly WT taekvondodan Qazaqstan Respýblıkasynyń sport sheberi atandy. Sporttaǵy mansabyn 2010 jyly bastady.

Sportshynyń búgingi jetistigi birden jáne kezdeısoq samǵaý arqyly emes, satylap ósýmen jáne kóp ter tóge otyryp jattyǵýdyń arqasynda keldi.

Ol bul tabysqa jetýde óziniń bapkeri Erjan Ýrmanovtyń sińirgen eńbeginiń zor ekenin aıtady.

2 021 jylǵy 4-12 naýryz aralyǵynda Taldyqorǵan qalasynda ótetin «WT» taekvondodan Qazaqstan Respýblıkasynyń Chempıonatynda sheberlik synap kórýdi josparlap otyr.

«Meniń maqsatym - árdaıym jetilý jáne azamattyq qorǵaý organdarynda laıyqty qyzmet atqarý, aldaǵy ýaqytta osy baǵytta joǵary oqý ornyna «Tirshilik qaýipsizdigi negizi» mamandyǵy boıynsha oqýǵa túsý jáne mansap satysymen joǵary jetistikterge jetý» - dep oıymen bólisti Araılym Qajytaeva.